Charter Document - 04940084
Charter Number: | 04940084 |
---|---|
Cartulary Title: | Cartulaire de l'Hôtel-Dieu de Pontoise |
Charter Language: | French |
Charter Origin: | Lay |
Charter Type(s): | Concession |
Date: | 1277 |
Date type: | Internal, A.D. |
Resource Link(s): |
|
Charter:
A touz ceus qui ces presentes lettres verront et orront Ansel dit de Lille escuier fuiz jadis monsegneur Pierre de Lille jadis chevalier et damoisele Eustace de Puiseus fame du devant dit Ansel salut a nostre Segneur Sachent tuit present et a venir que nous avons vendu et a touz jorz quitié sans esperance de james rapeler au mestre a la prieuse aus freres et as sereurs de la Meson Dieu de Pontoise pour vint livres de parisis des quiex nos nos tenons bien et laiaument apaiez en deniers lès au tans que cette lettre fu fete Et renonçon a ce que nous ne puisson dire des ore en avant que nous naions eue et receue la somme dargent devant dite du tout en tout Cest assavoir tout le droit et toute la segnorie que nos avions et povions avoir et tout ce qui a nous appartenoit en un fié que Guillaume de Chavençon tenoit de nous qui es assis as Mesieres en ostisses terres masures ou mesons en cens en rentes de chapons et des autres muebles en champarz et en autres choses Lequel fié nos tenions des devant diz mestre prieuse freres et sereurs de la devant dite Meson Dieu et mouvoit de eus en fié [] Et prometons par nos loiaus creanz et et en bonne foi que jamès par reson de eritage de douaire de don por noces de conquest de aumosne ou par autre reson quele qu elle soit dore en avant au devant dit fié rien ne demanderon ne par autre demander ne feron ne les devant diz acheteurs ne leurs successeurs ou ceus qui auront cause de eus devant aucun juge de crestienté ou de courtlaie ne traveillerons mes les devant dites segneurie et le droit devant dit garantirons delivreron et deffendron as us et as coustumes du pais en contre touz Et quant à ces choses nos nos soumeton a la juridicion de la court de Pontoise Et pour que ce soit ferme et estable nos Ansel et Huitace avons ces lettres seellees de nos propres seaus Ce fu fet en lan de l'Incarnation Nostre Segneur MCCLXXVI au mois de fevrier