Charter Document - 04940068

Je Bauduins de Poiz damoisiaus fix monseignor Hue de Poiz chevalier mort fas a savoir a toz ceux qui ces presentes lettres verront et orront que comme nos fussient vii enfant et eusiemes entre nous vii ensemble la signorie et le tresfons de ii masures que Richars de Liex et Symons li Juesnes vendirent à noble homme Loys par la grace de Dieu roi de France mort por la Maison Dieu de Pontoise lesqueles masures sont assises entre la devant dite Maison Dieu dune part et la maison qui fu Pierre le Juene d'autre part E mi dui freres Jehans et Robers et mes deus sereurs damoiseles Phelipe et Agnes ainnées de moi aient pieça vendu leurs iiij parties et quitiées à la devant dite Maison Dieu de Pontoise por xi lbr viii s vi d de Paris desqueus plains paiemens est faiz a eus en argent sec conté et receu et de ce aientil donné bonnes lettres seelées de leur seiaus Je Bauduins devant dis ai vendu la quinte partie laquele je avoie en ces ij masures devant dites à la Maison Dieu de Pontoise et quite a toz jors pour le pris de lvij s et ij d parisis lesqueus jai receu par ma main en argent tout sec et men tieng a paié a tozjors et premet par la foi de mon cors fiancée et donée que des or en avant en la quinte partie de ces ij masures devant dites ne reclammerai ne moi ne mi oir droiture ne signourie ne autre chose ne ne ferai reclammer par raison deritage ne signourie ne par nule autre raison ains weil et otroi que la devant dite Maison Dieu tiegne des or en avant en main morte la quinte partie des devant dites masures Et de ces choses devant dites je Bauduins devant dis promet par ma foi aporter loial guarentie a la devant dite Maison Dieu contre touz as us et as coutumes dou pais Et por ce que ceste chose soit ferme et estable jai ces presentes lettres seelées de mon seel Ce fu fait a Pontoise en lan de lincarnation Nostre Signor MCCLXXI le mois davril