Charter Document - 04940059

A toz ceus qui ces presentes lettres verront Oide de Centnoiz chevalier saluz Je fes a savoir que j'ai ferme et estable tote la vente que le noble home monsegner Gefroi dit de la Chapele chevalier et la noble fame Madame Marguerite fame dicelui ont fete a tozjors au mestre a la prieuse a freres et au sereurs de la Meson Dieu de Pontoise Cest asavoir de totes les choses que icil monsegneur Gefroi et madame Marguerite sa fame tenoient de moi au Mesieres en fief saent en terres en rentes en fief en cens en ostises en justice en chapart en mesons en l'arriere fief que Henri de Piseues escuier tenoit dou devant dit monsegneur Gefroi en fief et en homage et en totes les autres choses qu'iles confessoient queil tenoient de moi en fief comme de premier segneur Et promis par ma foi que contre cet amortissement ne vendroi ni ne feroi venir [] et que les dites choses vendues je et mi hoir lesquieus jé obligiez a ce seroie tenuz comme premier sires a garantir a delivrer à deffendre [] à la dite Meson Dieu en main morte a toz jorz Et porce que ce soit ferme et estable jé scelé les lettres de l'emprainte de mon seel En len de l'Incarnation Nostre Segneur MCC et sexante et set En mois de juig