Charter Document - 04930058
| Charter Number: | 04930058 |
|---|---|
| Cartulary Title: | Cartulaire et censier de Saint-Merry de Paris |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1284 |
| Date type: | Internal, A.D. |
| Resource Link(s): |
|
Charter:
Universis litteras inspecturis G[aufridus de Barbo] decanus et capitulum Parisienses salutem in Domino Notum facimus quod coram nobis constitutus Johannes de Meriaco vicarius in ecclesia Parisiensi et canonicus ecclesie Sancti Mederici Parisiensis asseruit quod ipse habebat tenebat et possidebat ex conquestu suo quamdam domum sitam Parisius ultra Magnum Pontem in vico qui dicitur Curie Roberti de Parisius in censiva et dominio Sancti Mederici Parisiensis contiguam ex una parte domui Radulfi de Gagniaco et ex altera parte domui que quondam fuit defuncti Symonis quondam capellani in ecclesia Sancti Mederici predicta oneratam in centum solidis parisiensium annui augmentati census debitis quibusdam civibus Parisiensibus Et voluit dictus Johannes quod dicta domus deveniat ad illum qui habet et tenet seu habebit et tenebit quandam capellaniam quam ipse Johannes fundavit in ecclesia Parisiensi possidenda et habenda perpetuo pacifice et quiete hoc adjuto quod ipse capellanus predicte capellanie solvat et solvere teneatur quinquaginta solidos parisiensium quolibet anno in posterum ecclesie Parisiensi ad opus anniversarii defuncti magistri Anselli de Buciaco quondam canonici Parisiensis et ex alia parte triginta solidos parisiensium predicte ecclesie Sancti Mederici pro anniversario dicti Johannis in eadem ecclesia Sancti Mederici annis singulis post decessum ipsius in perpetuum faciendo ita quod quandiu vixerit idem Johannes celebrabuntur due misse in dicta ecclesia Sancti Mederici solempniter ad majus altare pro ipso una silicet de Sancto Spiritu et alia de Virgine gloriosa annuatim et post decessum ejusdem convertatur missa de Sancto Spiritu in vigilia et missa pro anniversario ejusdem Canonici vero predicte ecclesie Sancti Mederici coram nobis constituti ad preces et instantiam dicti Johannis totam domum predictam admortizaverunt volentes ex nunc et consentientes expresse quod dictus Johannes et illi qui causam habebunt ab ipso ut predicitur in eadem totam predictam domum habeant teneant et possideant in manu mortua perpetuo pacifice et quiete absque coactione vendendi distrahendi aut extra manum suam ponendi salvis et exceptis ab admortizatione predicta predictis centum solidis qui debentur civibus Parisiensibus ut superius est expressum qui centum solidi non sunt nec erunt per predicta admortizati Pro qua admortizatione predicta idem Johannes coram nobis voluit et concessit expresse quod dicti canonici Sancti Mederici habeant et percipiant in perpetuum viginti solidos parisiensium annui redditus super dicta domo pro admortizatione predicta Insuper voluit dictus Johannes quod quilibet tam canonicus quam de comunitate qui presens fuerit in dictis vigilia et missa habeat octo denarios parisienses et si quod residuum fuerit illud distribuatur clericis dicte ecclesie Sancti Mederici per manus dictorum canonicorum prout sibi visum fuerit expedire In cujus rei testimonium et munimen sigillum nostrum litteris presentibus duximus apponendum Datum anno Domini M ducentesimo octogesimo quarto mense junio