Charter Document - 04930053

In nomine Patris et Filii et Spiritus Sancti Amen Proponente in jure coram nobis procuratore capituli seu canonicorum ecclesie Sancti Mederici Parisiensis contra decanum et capitulum Sancti Germani Autissiodorensis Parisius quod cum ipsi canonici Sancti Mederici Parisiensis sint et fuerint in possessione vel quasi conferendi in ecclesia Sancti Germani predicti quandam vicariam vicarium ejusdem vicarie pro voluntate ipsorum canonicorum Sancti Mederici Parisiensis revocando et removendo ac ipsi canonici Sancti Mederici Parisiensis dictam vicariam contulissent domino Dyonisio Britoni presbitero ipsi decanus et capitulum Sancti Germani ejusdem vicarium ipsius ipsis canonicis Sancti Mederici Parisiensis absentibus et irrequisitis examinaverunt contradicentes ante examinationem eumdem recipere in vicarium nisi prius examinaretur ab ipsis in prejudicium ipsorum canonicorum Sancti Mederici cum ipsi decanus et capitulum non consueverint examinare vicarium ab eisdem canonicis Sancti Mederici in eadem ecclesia temporibus preteritis institutum nec alias ad ipsos pertinet examinatio ipsius vicarii ut dicebat idem procurator Et ideo petente eodem procuratore nomine dictorum canonicorum Sancti Mederici a nobis denunciari irritam et inanem examinationem factam ab eodem decano et capitulo ut dictum est et inhiberi eisdem per nos ne se de tali examinatione intromitterent et sibi caveri ne talem examinationem de cetero presumerent attemptare et pronunciari a nobis ad ipsos decanum et capitulum non pertinere examinationem vicarii predicti Herveo vero procuratore dictorum decani et capituli in jure premissa vera esse negante lite super premissis legitime contestata prestito hinc inde calumpnie seu de veritate dicenda juramento positionibus et responsionibus factis et confessionibus in jure factis attente auditis partibus in hiis que proponere voluerunt die ad audiendam diffinitivam sententiam partibus assignata procuratoribus partium in jure presentibus et sententiam sibi reddi instanter petentibus consideratis omnibus que nos movere poterant et debebant omnibusque rite peractis communicato bonorum consilio cum non sit probatum Dyonisium vicarium dictorum canonicorum Sancti Mederici fuisse examinatum a decano et capitulo Sancti Germani predicti quando ipsi canonici Sancti Mederici predicti eumdem Dyonisium fecerunt in dicta ecclesia Sancti Germani vicarium quantum ad hoc ut denuncietur examinatio irrita et inanis duximus eosdem decanum et capitulum absolvendos et eosdem quantum ad hoc absolvimus Inhibemus tum eisdem decano et capitulo Sancti Germani ne de examinatione vicarii Sancti Mederici predicti se intromittant cum non sit ostensum ex parte decani et capituli Sancti Germani examinationem dicti vicarii ad eos debere pertinere Actum anno Domini MCCLX secundo mense februario