Charter Document - 04930051
| Charter Number: | 04930051 |
|---|---|
| Cartulary Title: | Cartulaire et censier de Saint-Merry de Paris |
| Charter Language: | Latin |
| Charter Origin: | Lay |
| Charter Type(s): | Acknowledgment |
| Date: | 1251 |
| Date type: | Internal, A.D., Feast |
| Resource Link(s): |
Cartulaires d'Île-de-France |
Charter:
Universis presentes litteras inspecturis officialis curie Parisiensis salutem in Domino Notum facimus quod coram nobis in jure constitutus Gaufridus dictus de Bailneolio filius quondam defunctorum Ade de Bailneolio et Odeline ejus uxoris quorum heres est et bona eorum possidet recognovit quod dicti Adam et Odelina in extremis legaverunt canonicis Sancti Mederici Parisiensis ad opus anniversariorum suorum in dictorum canonicorum ecclesia celebrandorum quinque solidos parisiensium annui redditus videlicet dictus Adam duos solidos et dicta Odelina tres solidos parisiensium habendos et percipiendos in posterum annuatim super bona eorumdem defunctorum Recognovit enim se a tempore mortis ipsorum dictum redditum persolvisse eisdem canonicis annuatim et ipsos canonicos a dicto tempore citra fuisse in pacifica possessione vel quasi percipiendi annuatim debitum supradictum Et promisit idem Gaufridus quod dictum redditum reddet annuatim ad opus dictorum anniversariorum in octabis beatorum apostolorum Petri et Pauli se et universa bona sua et heredes suos ad hec obligans coram nobis canonicis memoratis Datum et actum anno Domini MCCL primo die Veneris post festum beati Martini estivalis