Charter Document - 04930034

Universis presentes litteras inspecturis abbatissa Sancti Antonii Parisiensis totusque ejusdem loci conventus Cisterciensis ordinis eternam in Domino salutem Notum facimus quod cum questio mota fuisset inter nos ex una parte et canonicos Sancti Mederici Parisiensis ex altera super eo quod dicti canonici volebant ut nos poneremus extra manum nostram quamdam domum quam defuncti Petrus Leber et Agnes uxor ejus nobis et ecclesie nostre dederant in perpetuam elemosinam sitam Parisius contiguam domui nostre prope domum Petri Conversi in censiva dictorum canonicorum pro majori parte tandem nos et predicti canonici compromisimus pro bono pacis in venerabiles viros [Lucam de Lauduno] decanum magistrum Hugonem de Caprosia canonicum Parisiensem et Regnerum Bordum civem Parisiensem sub pena centum librarum parisiensium Qui arbitri dictam sententiam seu arbitrium protulerunt modo videlicet arbitrando dicentes quod nos et ecclesia nostra tenebimus ac possidebimus dictam domum pro rata illa que est in dominio dictorum canonicorum sita sine aliqua coactione vendendi vel alienandi in manu mortua vel extra manum nostram ponendi ita tamen quod nos persolvemus ex jure et in perpetuum singulis annis jam dictis canonicis quadraginta quinque solidos parisiensium annui census videlicet medietatem ad Nativitatem beati Johannis Baptiste et ad Natale Domini aliam medietatem salvo etiam dictis canonicis theloneo roagio et omni jure et dominio que possunt et debent et consueta sunt eisdem canonicis tamquam dominis fundi terre quocunque casu provenire Quod arbitrium nos ratum et gratum habemus concedimus et acceptamus et promittimus per stipulationem legitimam quod censum predictum persolvemus annuatim memoratis canonicis modo prenotato Et ut hec rata permaneant et inconcussa presentes litteras sigilli nostri impressione fecimus communiri Datum anno Domini MCCXLVIII mense junio