Charter Document - 04930004
Charter Number: | 04930004 |
---|---|
Cartulary Title: | Cartulaire et censier de Saint-Merry de Paris |
Charter Language: | Latin |
Charter Origin: | Religious |
Charter Type(s): | Order |
Date: | 1219 |
Date type: | Internal, A.D. |
Resource Link(s): |
Cartulaires d'Île-de-France |
Charter:
Omnibus presentes litteras inspecturis salutem in Domino Volentes statum ecclesie Sancti Mederici Parisiensis precipue circa regimen animarum plebis illius ecclesie in melius corrigere deliberatione habita de prudencium consilio statum supradictum ordinavimus in hunc modum statuentes ad petitionem canonicorum illius ecclesie et de communi assensu eorumdem ut prebenda que fuit defuncti Henrici quondam canonici dicte ecclesie et modo est Stephani de Ponte presbiteri successoris ejusdem semper et perpetuo sit connexa parrochie et versa vice parrochia prebende et cuicumque contulerimus illam prebendam conferemus simul et parrochiam nec prebenda a parrochia nec parrochia a prebenda nullatenus poterunt separari et quicumque resignabit alterum necesse erit ut resignet et reliquum sex aliis canonicis illius ecclesie a cura animarum ecclesie penitus absolutis Et quoniam maxima portio prebendarum illius ecclesie consistit in proventibus parrochialibus ejusdem visum fuit nobis equum et justum ut sex canonici qui absoluti sunt a cura animarum de dictis proventibus percipient singulis annis a plebano canonico dicte ecclesie per quatuor terminos anni xxi et iiii libras Parisiensis monete videlicet ad octabas sancti Johannis Baptiste sex libras ad octabas Omnium Sanctorum sex libras ad octabas Epyphanie sex libras et ad octabas Pasche sex libras Preter hec autem hiidem sex canonici habebunt in duabus festivitatibus anni scilicet in festo apostolorum Petri et Pauli et in festo sancti Leonardi totam ceram et pecuniam que in illis festivitatibus offerentur et plebanus canonicus illius ecclesie cum eisdem sex et equis partibus suam percipiet portionem Tota vero cera que in dicta ecclesia offeretur per totum annum absque ulla contradictione et exceptione erit plebani canonici preterquam in duabus festivitatibus supradictis scilicet in festo apostolorum Petri et Pauli et in festo sancti Leonardi Preterea sex alii canonici singuli in singulis septimanis suis totam pecuniam que offertur in magna missa ad majus altare habebunt similiter et plebanus canonicus in septimana sua Panis et vinum quandocumque offerentur in ecclesia erunt plebani canonici illius ecclesie et sex canonici in hiis nichil commune habebunt cum plebano canonico thure excepto quod commune erit tam plebano canonico quam vi aliis canonicis ad servitium majoris altaris et ex equis partibus dividetur Oportebit etiam quod plebanus canonicus inveniat totum luminare consuetum ab antiquo in ecclesia illa De communi vero invenient tam plebanus canonicus quam alii canonici cordas campanarum et oleum ad servitium unius lampadis coram majori altari et in tribus anni festivitatibus scilicet in Pascha Penthecoste et in Natali Domini reddet idem plebanus canonicus nummos vicariarum quibus debentur hiis scilicet qui intererunt servitio absentibus vero nichil dabitur Et in vigiliis estivalibus cantatis matutinis dimidium sextarium vini insimul ad bibendum et singulis canonicorum et clericorum de choro dabit unam candelam de quibus tres dantur pro nummo Hec autem facimus salvis antiquis aliis ecclesie consuetudinibus salvo quoque et retento ut processu temporis si expedire viderimus aliter de premissis et aliis disponere valeamus Actum anno Domini millesimo CC nono decimo mense maio