Charter Document - 04929273

Par le commandement des Mestres alerent les Jurés en la maison mestre Thomas de Paris et Jehan d'Arraz pour departir le descort qui estoit entre eus par la raison d'unes estuves et d'une ruele Lesqués Jurés sunt ainsi només c'est a savoir mestre Thierri mestre Estienne de Breye mestre Jehan de la Barre mestre Richart de Forest mestre Raoul Fonvielle mestre Guerin de Macy mestre Etiene de St Germain mestre Robert le Chacier Qui dient que d'endroit les estuves que eles soient ostées de la ou eles estoient et mises la ou les bains sunt et ce ont monstré lesd Jurés as parties par devant Nicolas de Rosoy Et dient ainsi les Jurés que les bains puent bien demorer la ou les estuves estaient en une maniere que li Juré dient qu'il i ait un pié de contremur se il n'i est et qu'il soit d'usques en haut de premieres soulives Et dient li Juré de ce mur moitoien qui est entre mestre Thomas et Jehan d'Arraz que il soit amendé en compagnie en tele maniere que Jehan d'Arraz en paiera parisis et mestre Thomas tournois dusques a la basse couverture Derechief li Juré dient pour la ruele que l'uiz Jehan d'Arraz soit destoupé et qu'il ait entrée et issue en la ruele ainsi comme il souloit avoir et que se l'uisserie li nuist que il la puet faire ailleurs la ou il vodra de tel grant comme elle est Et dient li Juré que le hebergage que mestre Thomas a fait en cele ruele doit estre osté se ainsi n'est que mestre Thomas ne puisse monstrer que il i doie avoir par point de lettre ou de tesmoins Et dient que la pente du mur qui est Jehan d'Arraz qui tient a la ruelle du lonc dusques en haut de douze piés a plon soit ostée en la ruele et d'ileuques en amont soit osté ce qui pendra plus de deus doie Et dient li Juré que tant comme il a du mur Jehan d'Arraz en la cour mestre Thomas que il soit mis a plon du pié dusques au haut de la maison Derechief li Juré disent que li conduis de lad ruele soit ostés dou tout Derechief que l'uis de cele ruelle soit osté et que l'uis de devers la voie sera de deus pieces et pendra de ça et de la et sera fais as communs despens desd parties et ara chascun desd parties sa clef Derechief que ce qui est osté dou conduit de la ruele pour veoir dedens iceli conduit soit refait as despens doudit Jehan et sera lad ruele commune entre lesd parties