Charter Document - 04921266

A tous nous Jehan de Chastillon conte de Bloys sire d'Avesnes et Aliz sa compaigne contesse de Bloys et dame d'Avesnes fesons a savoir que nous voulons leons et otroions et avons otroié les parties que monseingnor Amaurri de Meulant Guobert d'Argis et Yde sa fame Guillaume des Essarz et Ysabel sa fame Aubert de Longueval et Anne sa fame chevaliers et dames ont faites de la forest de Roissy gar ce est nostre grand proufit et le leur C'est a savoir à l'abé et au convent des Fossés et a leur ostes de Torcy sept vins et deus arpens de bois derechief au prieur et au couvent de Gournoy trois cenz arpens et à leur ostes de Roissy saze vins et dis arpenz de rechief au conte de Bar a ses hostes de Torcy sis cenz et cinquante arpenz Derechief a Jehan de la Gene personne de Saint Bon soissante arpens Derechief à monseingnor Aubert de Longueval et à Anne sa fame cinc cens et cinquante arpens lesquex Jehan et monseingnor Aubert tendront dud Amaurri et lidit Amaurri de nous Derechief au devant dit Amaurri sept cens arpens Derechief aud Gobert et Yde douze vinz arpenz Derechief aud Guille et Ysabel sept vinz et dis arpens Liquel Amaurri Guobert Yde Guille et Ysabel tendront de nous L'an de l'Incarnation N S mil CC soissante et saze et mois de marz