Charter Document - 04921202
| Charter Number: | 04921202 |
|---|---|
| Cartulary Title: | Recueil de chartes et documents de Saint-Martin-des-Champs [Paris] |
| Charter Language: | Latin |
| Charter Origin: | Lay |
| Charter Type(s): | Arbitration |
| Date: | 1265 |
| Date type: | Internal, A.D., Feast |
| Resource Link(s): |
Cartulaires d'Île-de-France |
Charter:
U p l i Officialis curie Parisiensis notum facio quod cum anno Domini millesimo ducentesimo sexagesimo quinto die jovis ante Nativitatem Beate Marie Virginis ad quem diem citati erant peremptorie ac personaliter coram nobis Stephanus de Petrosa miles et Guerinus de Gaigniaco armiger videlicet dictus miles prelaturus arbitrium una cum religioso viro fratre Nicholao camerario Sti Martini de Campis Paris super contentione mota inter Priorem et conventum ecclesie Beate Marie de Gornaio super Maternam ex una parte ac dictum Guerinum de altera armigerum de qua contentione ut dicebatur erat in ipsos a partibus compromissum necnon et dictus Guerinus ad instantiam dictorum Prioris et conventus auditurus dictum arbitrium a dictis arbitris probaturum dicta die dictis arbitris et dicto Priore et magistro Adam de Sancto Mederico procuratore dicti conventus ac Guerino coram nobis in jure personaliter comparentibus confessi fuerunt dicti Prior procurator conventus et Guerinus se compromisisse in predictos arbitros super eo quod dicti Prior et conventus dicebant et asserebant quod dictus Guerinus tenebatur molere per bannum ad molendina de Gornaio que sunt dictorum Prioris et conventus sicut faciunt omnes homines in villa de Gaigniaco commorantes et super eo quod dictus Guerinus contrarium asserebat confessi etiam fuerunt coram nobis se promisisse stare per prestitam fidem arbitrio eorumdem quocumque modo dicti duo arbitri super premissis pace judicio ut quocunque modo durarent conducendum et dictum eorumdem per eandem fidem inviolabiliter observare Qua confessione sic facta dicti arbitri in nostra presencia propter hec constituti dictum suum seu arbitrium in modo qui sequitur protulerunt Visis attestationibus testium hinc inde productis communicato bonorum virorum et peritorum consilio per nostrum arbitrium pronunciamus dictum Guerinum ratione loci in quo degit seu moratur apud Gagniacum teneri molere per bannum ad molendina ecclesie Beate Marie de Gornaio sita in Maternam sicuti alii homines in villa de Gagniaco commorantes In cujus rei testimonium ad petitionem dictorum arbitrorum et Prioris et procuratoris conventus predictorum sigillum curie Parisiensis litteris presentibus duximus apponendum Datum anno Domini et die predictis