Charter Document - 04921192

A tous Estiene Boiliaue garde de la prevosté de Paris salut Nous fesons a savoir que pardevant nos vindrent mesire Jehan du Genestoy chevalier et madame Alis sa fame requenurent en droit qu'il avoient quité des ore en avant a touz jorz de leur bone volenté sanz nule force au prieur et au convent de Saint Martin des Chams de Paris toutes les choses que Felippes de Villacrane escuyer et damoyselle Ysabel sa fame leur avoient venduees soit en cens soit en prez soit en chanpart soit en avainne soit en droitures soit en quel que chose que ce soit Les quex choses desus dites sunt en leur fié en la ville d'Arcuel et de Villejuif aus hus et aus coustumes de France sauf le droit Monsaigneur le Roy en toutes choses Et quant a ce tenir fermement ont obligié et soumis chascun pour le tout eus et leurs hairs et touz leurs biens muebles et non muebles presens et a venir L'an de l'Incarnation nostre Saigneur mil CC soissante et quatre eu mois de janvier