Charter Document - 04900711
| Charter Number: | 04900711 |
|---|---|
| Cartulary Title: | Recueil de chartes et documents de Saint-Martin-des-Champs [Paris] |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1214 |
| Date type: | Internal, A.D., Episcopal |
| Resource Link(s): |
Cartulaires d'Île-de-France |
Charter:
Petrus Dei gratia Parisiensis episcopus o p l i salutem in Domino Universitati vestre notum facimus quod cum Eo largiente qui ubi vult sue magnificentie largitatem infundit ecclesia de Sancto Bricio parrochianorum multitudine eatenus excrevisset quod quibusdam parrochianorum pro loci distancia non possent sacramenta ecclesiastica salubriter ministrari Nos de consensu Roberti presbiteri de Sancto Bricio capellam de Pissecoc parrochialem ecclesiam decrevimus faciendam de cujus parrochia erit utrumque Pissecoc et villa que dicitur Luat et illa que appellatur Blamu Ad substentationem itaque presbiteri ecclesie de Pissecoc dederunt in perpetuam elemosinam nomine quinte partis terre sue Petrus de Pissecoc assensu Matildis uxoris sue unum arpentum terre et unum arpentum vinee Eleoidis autem de Pissecoc unum arpentum vinee et Radulphus de Pissecoc unum modium boni mixtioli reddendum annuatim infra festum Sancti Martini hyemalis in grangia sua et decem solidos in censu suo de Pissecoc in crastino octabarum Beati Dyonisii annuatim sine difficultate qualibet persolvendos et quinque arpennos terre Eremburgis quoque de Bra dedit eidem ecclesie de Pissecoc assensu filiorum suorum Petri et Renaudi militum octo arpennos terre Sane in recompensationem damnorum que ecclesia de Sto Bricio propter hoc sustinebit de cujus parrochia memorata ecclesia de Pissecoc esi decisa dederunt pretaxate ecclesie de Sto Bricio profatus Petrus de Pissecoc et Matildis uxor sua triginta solidos paris Eremburgis de Bra assentientibus predictis filiis suis Petro et Renaudo triginta solidos in censibus suis de Pissecoc in crastino octabarum Sti Dionisii annuatim pacifice persolvendos ita videlicet quod si presbiter de Sto Bricio propter hoc dampnum aliquod sustinueret prefati Petrus et Eremburgis et filii sui vel quicumque terram eorum haberet ipsi presbitero de Sto Bricio omnia dampna integraliter resarcirent et plenarie restaurarent Preterea prefatus presbiter de Sto Bricio habebit de terra predicta duos arpennos sitos super rivum apud Sanctum Bricium et quamdiu vixerit pacifice possidebit Post obitum autem ipsius alter arpennus terre erit fabrice ecclesie et alter presbiterii ejusdem ecclesie quiete et pacifice in perpetuum possidendi Actum anno Domini millesimo ducentesimo decimo quarto mense aprili pontificatus nostri anno sexto