Charter Document - 04900677

Notum sit omnibus tam presentibus quam futuris quod domini R[ogerius] de Mellento et W[illelmus] de Garlanda adnichilationem nemoris de Russiaco in quo monachi de Gournayo et homines eorum de Rossiaco habent usuarium ad ardendum et hospitandum et proprie necessitatis usum in posterum precaventes communi assensu statuerunt concedentibus uxoribus eorum et filiis Amalrico et Willelmo et Theobaldo quod per x annos tam domini quam monachi et homines eorum abstinebunt a cedendis quercubus nisi ad hospitandum et proprie necessitatis usum Predicti domini custodient nemus ab hominibus castri de Torciaco quia in ipso non habent usuarium et homines monachorum sub jurejurando nulli homini cedent ligna in eodem nemore nisi dominis nemoris et monachis ad usus proprios Carbones non fient ad vendendum nisi de lignis lapsis ad usus proprios de nemore lapso vel mortuo Ad custodiendum nemus prenominati domini ponent forestarios et Andreas conversus monachorum vel alius si ipse defecerit qui ad arbitrium dominorum ponetur habebit respectum super eos facto juramento quod si cognoverit eos de premissis preterire et dampna dominis vel injurias monachis et hominibus eorum inferre fideliter referet ad dominos qui ad relationem ipsius emendare tenebuntur Si homines de Rossiaco reperti fuerint quercus cedentes nisi pro premissis causis capient eos forestarii et recludent sed emenda eorum xii denarios non excedet Quod si contigerit dominos statuta non conservare monachi et homines eorum non poterunt cogi ad observationem premissorum sed libere redibunt ad solitum usuarium Ne vero premissa statuta possint trahi in consuetudinem ad prejudicium monachorum et hominum eorum voluerunt domini hec scripta signari et sigillorum suorum appositione muniri et evolutis decem annis sine contradictione deinceps debitum jus et usuarium habebunt Quando vero domini de nemore vendere voluerint ad unam partem per arpennos vendent Anno ab Incarnatione Domini MCCVIII mense februario