Charter Document - 04900632

Ego Gaufridus Dei gratia Silvanectensis episcopus Noverint qui presentes litteras viderint et audierint inter capitulum Beate Marie Silvanectensis et Priorem et monachos Sancti Nicholai nobis mediantibus assensu Prioris Sancti Martini de Campis talem intervenisse compositionem quod idem Capitulum predictis monachis concessit ne unquam posset eos compellere ut habeant vicarium in ecclesia Beate Marie qui prebendam ipsorum quam in eadem ecclesia habent deserviat vel ut ipsi mansionem ibi facere teneantur nec pro eadem prebenda aliud servitium facient quam facere solent septimanam suam tam in missa quam in horis custodiam chori in ordine suo et in majoribus festis invitatorium cantabunt in illis scilicet in quibus quatuor cantant illud Relaxat eos Capitulum ne ad processionem in Assumptione Beate Marie ad quam venire consueverant de cetero venire teneantur Quando canonici illi in quorum parte monachi capient fructus prebende sue de fructibus prebendarum suarum voluerint computare diem denuntiabunt in domo Sancti Nicholai vel Priori vel alicui monachorum et si Prior sive aliquis monachorum quem pro se mittet ad diem illum venerit intererit illi computationi In eadem libertate et integritate habebunt monachi prebendam suam in qua habent alii canonici suas nisi quod vocem in Capitulo non habebunt nec Capitulum intrabunt nisi a Capitulo vocentur nec de distributione vel computatione que in Capitulo fit aliquid requirere poterunt Si ad faciendam procurationem vel Archiepiscopi vel alicujus legati vel alicujus persone vel pro aliquo alio negotio de corpore prebendarum aliquid communiter capiatur similiter de corpore prebende Sti Nicholai capietur In Quadragesima unus monachorum si voluerit cum aliis comedet in refectorio extra vero refectorium sicut nec licuit ita non licebit panem vel vinum extra refectorium percipere Si vinum de communitate extra Quadragesimam dividatur si Prior vel aliquis monachorum ecclesiam intraverit in illa die suam percipiet portionem Prior vero et monachi Sti Nicholai assensu predicti Prioris et conventus Sti Martini de Campis ad servitium Beate Marie augmentandum tenentur dare singulis annis tres modios bladi medietarii usque ad Natale Domini persolvendos Quod ut ratum habeatur ad preces utriusque partis hoc scriptum inde fieri et sigillo nostro fecimus confirmari Hanc autem compositionem sicut in hac carta annotata est ego W[illelmus] prior et conventus Sti Martini de Campis laudamus et ratam habemus et ut majorem in posterum obtineat vigorem ad ejus confirmationem sigillum nostrum cum sigillo domini Episcopi appendimus Actum anno ab Incarnatione Domini MCC quinto