Charter Document - 04890230

In nomine sancte et individue Trinitatis Incipit carta Johelis filii Alverdi Reverentissimo patri et domino Willelmo Exoniensi episcopo et universis sancte matris Ecclesie filiis ad quos presens scriptum pervenerit Johel filius Alvredi salutem in Domino Cum nos omnes a Xristo vocemur Xristiani et Salvatori s sequi debeamus vestigia illos quos Xristus ob seculi contemptum et religionis sue meritum filios specialiter vocat pia devotione venerari convenit et eorum sancto proposito devote prestare subsidium Ea propter universitati vestre notum fieri volo me pro salute anime mee et patris et matris mee et omnium parentum et amicorum meorum constituisse quandam obedienciam monachorum Cluniacensium apud Barnestaple ad honorem Dei et Domini nostri Ihesu Xristi sancteque Marie et sanctorum apostolorum Petri et Pauli et sancte Marie Magd[alene] et ipsam obedienciam ecclesie Sancti Petri de Cluniaco et ecclesie Sancti Martini de Campis subdidisse ad quam divina providente clementia devotus confugiam habitum monastice religionis suscepturus ibidemque onere carnis deposito et anima ad Conditoris sui gloriam suspirante misericordiam ipsius fiducialiter prestolabor Et quia ex voto teneor ecclesie Sancte Marie Magd[alene] extra castellum meum fundate tantum beneficii conferre unde sacer monachorum conventus constitui et sustentari possit ad sustentacionem ipsorum quasdam particulas terre mee donavi eis scilicet Pillonam cum bosco et marisco et Pillandam utrasque liberas et quietas cum omnibus appendiciis suis sicut unquam eas liberius et quietius habui et tenui Donavi etiam eis molendinum de Barnestaple liberum et quietum cum moltura tocius ville et castelli ita quod burgenses ad aliud molendinum molendino monachorum integro existente molere non poterunt Et totam terram extra muros que est inter portam de North et portam de Yest simul cum fosso usque ad contiguam viam Et totam aquam prout terra eorum extenditur Et totum tractum piscium ipsius aque tam in terra ipsorum quam in terra mea proxima ipsis quoque monachis exclusam piscarie in terra mea firmare licebit in quantum terra eorum extenditur ex altera parte aque Insuper autem eis concessi omnes terras suas et homines possessiones et elemosinas quas habent vel in posterum jure ac legaliter adquirere poterunt infra fines tocius terre mee et feudi mei habeant et teneant solutas liberas et quietas ab omnibus exactionibus hund[redis] placitis querelis et omni servitio et opere servili et omnibus consuetudinibus que excogitari poterunt Si quid vero forefacti vel querele inter homines eorum quacumque occasione inciderit monachi plenarie de qualibet causa curiam suam et justitiam habeant propriam et emendationem Et quia hec predicta pred fratrum sustentationi minime sufficere estimavi divini amoris instinctu totam ecclesiam de Barnestaple cum omnibus pertinenciis suis capellis decimis obventionibus et omnimodis fructibus et cum capella Sancti Salvii et oblationibus suis et totam ecclesiam Tavistochi et totum jus advocationis illius ecclesie cum omnibus ad eam pertinentibus liberam et quietam ab omni seculari servitio et exactione Et per manus venerabilis Willelmi Exoniensis episcopi cujus consilio et assensu prefatam obedientiam constitui hec predicta in proprios usus suos habenda et in perpetuum ele mosinam possidenda super altare Sancte Marie Magdalene devote obtuli per hoc scriptum Contuli etiam eisdem monachis duas partes decime de dominio meo de Fremington et totam decimam piscium Hec autem omnia sepedictis monachis contuli sicut dominus fundi melius plenius et liberius donare potest Et ne aliquis ex heredibus meis vel quilibet alius indevotus hanc donationem meam revocare vel in aliquo perturbare possit in posterum ipsam presenti scripto sigilli mei impressione signato roboravi Hiis testibus Ascelino archidiacono Osberto capellano episcopi Herveo capellano episcopi Ailrico decano Godwino sacerdote Exonie Willelmo de Framigton Willelmo de Raelega Willelmo de Cuvert Alvredo filio Nigelli Radulfo de Cruna Alvredo de Zoignies Malgero de Sancto Albino Walterio de Sancto Albino Rogerio Poeir