Charter Document - 04880126

Paschali summo Pontifici Ivo humilis ecclesie Carnotensis minister dilectionem filii et obedientiam per cuncta subjecti Notum esse volumus Excellentie vestre quia ego et domnus Theobaldus Beati Martini monasterii Parisiensis prior audientes miserabilem et mirabilem Remensis ecclesie desolationem ausu familiaritatis opportune et importune regem Francorum interpellavimus quatenus predicte ecclesie expulso invasore Gervarsio pacem restitueret et domnum Radulfum ejusdem ecclesie metropolitanum in gratiam suam receptum eidem ecclesie preesse concederet Acquievit tandem precibus nostris et concessit ut eum ad curiam suam que Aurelianis in Natali Domini congreganda erat secure adduceremus et ibi cum eo et cum principibus regni de hoc negotio quantum fieri posset salva regni integritate tractaremus Factum est ut condictum erat et convenientes in curiam multiplicatis intercessoribus petitionem nostram semel et sepius replicavimus Sed reclamante curia plenariam pacem impetrare nequivimus nisi predictus metropolitanus per manum et sacramentum eam fidelitatem regi faceret quam predecessoribus suis regibus Francorum antea fecerant omnes Remenses archiepiscopi et ceteri regni Francorum quamlibet religiosi et sancti episcopi Quod persuadentibus et impellentibus totius curie optimatibus etsi propter mandatorum rigorem minus licebat factum est tamen quia ecclesiastice paci et fraterne dilectioni sic expediebat Cum enim plenitudo legis sit charitas in hoc legibus obtemperatum esse credimus in quo charitatis opus impletum esse cognovimus Hec dicendo tamen doctam Paternitatem Vestram non docemus sed Eamdem consulendo et rogando monemus ut ibi consilii et pietatis studeatis visceribus abundare ubi fas non est debitam fortitudinem exercere Valete