Charter Document - 04880003
| Charter Number: | 04880003 |
|---|---|
| Cartulary Title: | Recueil de chartes et documents de Saint-Martin-des-Champs [Paris] |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 0930 |
| Date type: | Internal, Regnal |
| Resource Link(s): |
|
Charter:
Quoniam inter nos [sicut ait Apostolus] fines seculorum devenerunt profecto unicuique convenit Christiano ita presentis seculi cursum perficere ut dum temporalibus fruitur bonis summo ac vigilanti studio caveat ne eternis subdatur ponis sed in stadio hujus vite positus sic utatur transitoriis ut in futuro gaudeat premio mansure felicitatis Quapropter ego in Dei nomine Hugo comes et marchio considerans peccatorum meorum pondus et miseriarum presentis seculi onus quoddam proprium hereditatis mee abbatiam Sancti Simphoriani positam inter muros Aurelianis que mihi paterna hereditate legaliter pertinere videtur pro remedio anime patris matrisque mee atque pro redemptione meorum peccaminum ceterorumque parentum meorum cum duabus ecclesiis in honore S Lete sanctique Sulpitii in suburbio prefate urbis positis necnon cum ceteris ecclesiis ad illam abbatiam pertinentibus villis vineis pratis silvis terris arabilibus cultis et incultis aquis aquarumve decursibus quicquid ad ipsam aspicit vel aspicere videtur totum et ad integrum beatissimo confessori Christi Sansoni et suo episcopo Agano suisque successoribus necnon et canonicis ibidem Deo et sancto Sansoni servientibus et inantea servituris perpetualiter dono et in eternum habendum esse concedo Si quis vero heredum aut proheredum meorum huic donationi contradicere aliquid voluerit [quod nullatenus fieri credimus] nostraque statuta esse inconvulsa noluerit iram incurret omnipotentis Dei sanctique Sansonis suaque repetitio nullum effectum obtineat expulsusque a regione viventium eterna maledictione damnetur duroque anathemate percussus perpetuis incendiis maneat sine fine cruciandus Ut vero hoc scriptum mee donationis meeque humilitatis per succedentia temporum spatia firmius permaneat meo nomine illud pretitulavi et consignavi et nominibus nobilium clericorum et laicorum roborari precepi Actum Aurelianis civitate publice Hugo comes Signum item Hugonis comitis Anselmus humilis episcopus Theodericus Ermenterius levite S Fulconi S Theubaldi S Radulfi S Fulconi S Theubaldi Datum in mense maio anno VII regnante Radulfo rege D Lem manuensis