Charter Document - 04871362

A touz ceus qui verront ces présentes lettres Je Jehan dit Barat clerc salut Sachent tuit que comme plait contens et descort fust entre tres haute dame et puissant ma chiere dame Jehanne jadis fame de noble homme le conte d'Alencon et contesse de Bloys d'une part et honorables hommes et sages le deen et le chapistre d'Orliens en non de l'eglise d'Orliens d'autre seur la justice et seignorie de la ville de Noyen sur Leire ou terreoir et aus apertenances dou dit chapistre tant en eves comme en terres et especialment seur les espaves et escreues de l'eve de Leire en tant comme la terre du chapistre se estent le rapt le murtre l'arsin larrecin le sanc la force les bastars et toute autre maniere de justice et seur plusieurs autres choses et especialment et expressement seur ce que ladite contesse disoit que elle povoit et devoit et bien l'avoit usé de tenir et de faire tenir ses assises et ses plaiz en ladite ville de Noyen et aus apertenances lesdiz deen et chapistre disans et affremanz le contraire A la parfin les dites parties par souffisans procureurs establiz a ce establies en jugement en plain pallement devant les mestres ou pallement de la Chandeleur qui fu en l'an de grace MCCIIII et X de touz lesdiz plaiz et contens descort et debat et de touz autres qui peussent mouvoir entre les dites parties ou temps avenir pour raison on achoison de la dite ville de Noyen justice seignorie et apertenances d'icele se mistrent et compromistrent en moi Jehan Barat dessus dit haut et bas a m'ordenance et a ma volenté prometans les dites parties a tenir fermement garder et acomplir en bone foye mon dit et m'ordenance haut et bas a ma volenté seur le contens descort et debat et toutes les choses dessus diz et je a la priere de l'assentement et a la requeste des dites parties receu en moy le tes et la chargede l'ordenance et mise dessus diz oiées les parties diligeaument et les raisons d'icelles seue la verité et enquise euée deliberacion seur les choses devant dites di et pronunce mon dit et m'ordenance en Bouloigne mennair de la dite contesse de l'assentement des dites parties en la maniere qui s'en suit sauve aus dites parties et a chascune d'icelles les demaines rentes et redevances que elles ont et poursuient et ont acoustumé a avoir et pourseoir en la dite ville de Noyen et aus apertenances Premierement que la dite contesse ses hoirs et ses successeurs auront et pourserront des ores mes en avant et touz jours la justice du rapt du murtre arsin larrecin sanc et force et homicide et toutes les apertenances d'icele segont l'us et la coustume du pais Item toute la justice haute et basse dont l'amende monte plus de sept souls et demi Item l'espave par eve et par terre Item les bastarz de leur fames de cors la connoissance de leurs hommes de cors de muebles et de chatiex Item les diz deen et chapistre en non de leur dite eglise d'Orliens auront et pourserront eus et leur successeurs a touz mes la connoissance justice et execucion des censis champars et possessions de la dite ville de Noyen et des apartenances tenuz d'aus o toutes les apartenances amendes et emolumenz segont l'us et la coustume du pais et toute la justice des mueubles et de chatiex et de touz les cas dont l'amende ne monte plus haut de sept souz et demi Item la justice et la connoissance de muebles et de chatiex de leur hommes et fames de cors en la terre a la dite contesse de Noyen et des apartenances et de Blesais Item les bastars de leur fames en la dite ville de Noien et aus apartenances Item les escreues de Leire en tant comme leur terre se estent c'est assavoir les illes les saulaies les terres et tele maniere de choses Item les fros et les esances de la dite ville Item que le ressort et la garde d'aus et de touz leur biens et possessions que il ont et poursiéent par le dit et ordenance dessus diz et par autre cause raison et maniere en la dite ville de Noyen et aus apartenances seront et demorront au roy a touz jours sanz ce que la dite contesse ne ses hoirs i puissent jamais riens demander Item que ladite contesse ne ses gens ne porront tenir des ore en avant assise ne plaiz en ladite ville de Noyen c'est assavoir ou censit dudit chapistre ne allieurs en leur terreoir ne es apartenances ainsint toutes voies que se cas de crime ou autre aviennent en la dite ville ou aus apartenances d'icelle ou il convieigne ou doie ou puisse estre faite enqueste aprise ou enformement la dite contesse ou son commandement les porra faire en ladite ville de Noyen et aus apartenances tant par la connoissance des parties ou des accusez ou soupeconnez seur ce comme par autres preuves et ce fait la dite contesse ou ses justiciers qui seront pour le temps ou dit lieu seront tenuz amener hors de la dite ville et des apartenances pour jugier et justicier celui seur qui l'enqueste aprise ou enformement auront esté faiz Item se il avient forsfaiture ou eschoete a la dite contesse pour cas de crime ou par autre cas qui apartieigne a la dite contesse ou devant dit terreoir du dit chapistre segont l'us et la coustume du pais et dont ladite forsfaiture et eschoete sont tenuz dou dit chapistre ladite contesse et ses hoirs seront tenuz a la meitre hors de leur main et en autel main coustumiere comme celui dont elle avint dedenz l'an et le jour que elles seront eschoietes ou avenues a la dite contesse ou a ses hoirs et se il ne le font les diz deen et chapistre i porront assener comme a leur propre heritage et en faire leur volenté d'ileucen avant Item di et ordeine que l'une partie des dites parties contre l'autre contre le dit et ordenance dessusdiz en tout ou en partie ou en aucune chose d'iceus ne puisse gaaignier ou acquierre en saisine ne em propriete par tenue prescription saisine ou usage quel que il soient granz ou petiz Et quanqui sera fait encore je la pronunce pour nul et que les dites parties i renuncent des ja Item pour les fraudes et malices oster et eschiver et pour ce que ledit et ordenance dessus diz puissent durer et tenir sanz corrumpre je di et ordeine que le prevost ou la justice de ladite contesse ou de ses hoirs qui seront pour le temps ou dit lieu quant il vendront nouvelement en l'office seront tenuz des ore en avant a jurer par devant ladite contesse ses hoirs ou leur commandement present et appelé le prevost ou la justice des diz deen et chapistre qui sera pour le temps ou dit lieu pour les diz deen et chapistre que il gardera et tendra le dit et ordenance dessus diz bien et loieaument et que il n'empeechera ne ne soustrera le droit des diz deen et chapistre ne encontre ne vendra Et se il le fesoit par aucune aventure que si tost comme il le apercevra il le restorera adrecera et amendera et aussint sera tenuz a jurer le prevost ou la justice des diz deen et chapistre devant aus ou leur commandement present et appelé le prevost ou justice de la dite contesse ou de ses hoirs en la forme et maniere dessus diz Item par mon dit et ordenance je retiens a corrigier a ajouster a menuisier a esclarcir et interpreter en mon dit et ordenance dessus diz toutes fois que mestiers sera et il sera a faire Et se il avenoit que je morusse avant que ce fust fait il seroit fait par la court le roy Et di enquore et ordeineque du dit et ordenance dessus diz l'une partie donne a l'autre ses lettres pendanz et que il soit enregistré en la court le roy ou confermé du roy Lequel dit et ordenance si comme il est dessus dit et devisé voudrent louerent aprouverent et emologuerent expressement lesdites parties Et promistrent que il les garderoient tendroient et acompliroient et que encontre ne vendroient par aucune cause ou raison Ou tesmoing de laquele chose j'ai seelé cestes presentes lettres de mon propre seel Ce fut fait et donné de l'assentement des dites parties l'an de grace MCC quatre vingz et onze le merquedi apres la feste Saint Mathieu apostre