Charter Document - 04870371

A touz ceus qui verront cestes presentes letres Simon de Corceaux garde de la prevoste d'Orliens salut Sachent tuit que Robin de Sendillon escuier de la parroisse de Lailly establi par devant nos en droit reconnut que il a amorti baillé livré cessé quitté et delessié en main morte a touz jorz mes au dean et au chapistre d'Orliens et a lor successeurs et a ceus qui auront cause d'aux a touz jorz mes au non de lor eglise le fié de la quarte partie de la disme de Chaudre et des apartenences que les diz dean et chapistre tenoient ou devoient ou poient tenir doudit Robin que les diz dean et chapistre avoient euz de feu Johan de Tho et de feu Raou de Chenevieres jadis chanoines d'Orliens Et veut et accorde ledit Robin que les diz dean et chapistre et lor successeurs et ceus qui auront cause d'aux tiegnent ladite disme en main morte a touz jorz mes sauve le droit a ses sovrains Et promist le dit Robin que il james ancontre cest amortissement cession et quitence ne vendra ne assaiera a venir ne james en ladite disme rien ne reclamera ne fera reclamer par soi ne par autri par aucun droit par reson d'eritage de decevance de fié de rachat de quint denier de rerifié de lesion de circonvencion ne par aucune autre cause ou reson Et por cest amortissement cession et quitance ledit Robin a eu et receu des diz dean et chapistre en deniers soics nonbrez diseoict livres de paris desqueles XVIII livres parisis le dit Robin se tint enterignement a paiez par devant nos et renoinca a ce que il ne poist james dire que ladite somme de deniers ne li eust esté nombrée baillée et livrée et promist le dit Robin que il aux diz dean et chapistre et a lor successeurs et a ceus qui auront cause d'aux le dit fié de la quarte partie de la dite disme de Chaudré delivrera garentira et deffendra touz jorz mes verz touz et contre touz por lui por ses hoirs en mainmorte de empeschemenz qui de lui ne de ses hoirs ne de ceus qui auront cause de lui i porroient movoir ne sordre et que se les diz dean ou chapistre ou lor successeurs ou ceus qui auroient cause d'aux ou lor procurator ou le porteor de ces letres avoient fesoient ou soustenoient couz mises despens dommages ou deperiz par defaute de garenti ou de delivrance le dit Robin promist que il les lor rendroit et en creroit le procurator aux diz dean et chapistre ou le porteor de ces letres chascun endroit soi par son simple serement senz autre preve querre Et quant a ces choses tenir garder fere et acomplir fermement senz venir encontre par aucun droit ne par aucune autre cause ou reson ledit Robin a obligé aux diz dean et chapistre et a lor successeurs et a ceus qui auront cause d'aux et souzmis a la juridicion de la prevosté d'Orliens soi ses hoirs et touz ses biens muebles non muebles presenz ou a venir ou que il soient Et renonca quant a ces choses a toutes graces et a touz privelieges de croiz prise et a prendre a l'exception de tricherie de mal en action et en fet a toute decevance et error a toute lesion et circonvencion a tout benefice de restitucion en enterin a toute aide de droit de canon et de lai et a touz us coustumes establissemenz de pais et de leu a tout droit disent que renunciacion general ne doie valoir se l'especial ne voit devant et a toutes autres excepcions allegacions cavillacions deffenses et aides de fet et de droit qui poissent estre dites ne obicées contre ces letres Et en tesmoing de ce nos a la requeste des dites parties nos avons seelé ces letres dou seau de la prevosté d'Orliens Ce fut fet l'an de Nostre Seigneur MCCIIII diseoict le diemenche devant la Magdeleine