Charter Document - 04870328
| Charter Number: | 04870328 |
|---|---|
| Cartulary Title: | Cartulaire de Sainte-Croix d'Orléans |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1276 |
| Date type: | Internal, A.D. |
| Resource Link(s): |
|
Charter:
Philippus Dei gracia Francorum rex notum facimus omnibus tam presentibus quam futuris quod cum secundum ordinationem pie recordationis carissimi patrui nostri Alfonsi quondam comitis Pictavensis et Tholose executores sui testamenti ecclesie S Crucis Aurelianensis pro una capellania ibidem instituenda in qua quotidie celebretur missa ubi capellanus ipsius capellanie humano impedimento fuerit detentus pro dicto comite decreverunt assignari quindecim libras turonenses annui redditus Nos itaque carissimi patrui nostri piam ordinationem cupientes salubriter adimpleri volumus et precipimus ut quicumque fuerit pro tempore prepositus Aurelianensis exnunc dictis quindecim libris turonensibus annui redditus medietatem videlicet in termino Omnium Sanctorum capellano reddat et sine qualibet difficultate persolvat annuatim nullo alio mandato super hoc expectato Quod ut ratum et stabile permaneat in futurum presentibus litteris nostrum fecimus apponi sigillum Actum apud Vicenas anno Domini MCCLXXV mense martio