Charter Document - 04870308

Universis presentes litteras inspecturis officialis curie Aurelianensis salutem in Domino Notum facimus quod in nostra constituti presentia vir venerabilis Hugo archidiaconus Pithiveriensis et prior de Donesiaco confessi sunt coram nobis quod cum esset contentio inter ipsos ex una parte et venerabiles viros Odonem decanum totumque Aurelianensis ecclesie capitulum et Johannem et Odonem de Bosco Gaudi fratres ex altera super decimis novalium infra limites parrochie de Donesiaco sitorum priore et archidi[ac]ono supradictis asserentibus decimas novalium predictorum ad se pertinere parte altera hoc negante et dictis decano et capitulo ad se predictas decimas ad se pertinere dicentibus tandem post multas altercaciones inter predictos archidiaconum et priorem habentem potestatem et speciale mandatum a viris religiosis abbate et conventu de Balgenciaco componendi transigendi et pacificandi de contencione seu causa que vertebatur inter predictas partes de consilio venerabilis viri Hugonis archidiaconi Aurelianensis amicabilis composicio intervenit in hunc modum videlicet quod dicti decanus et capitulum decetero habebunt et percipient integraliter omnes decimas novalium tam presentium quam futurorum que sunt aut erunt infra limites parrochie de Donesiaco supradicte et propter hoc dicti decanus et capitulum ut confessi sunt coram nobis prior et archidiaconus predicti promiserunt dicto archidiacono quoad vixerit idem archidiaconus se soluturos per se vel per illum vel illos qui decimas decani et capituli apud Donesiacum sitas ad admodiaconem tenebunt annuatim unum modium siliginis in dicta terra ex trescentis ad mensuram de Checiaco post messes infra festum beati Remigii in capite octobris in granchia ipsorum decani et capituli Defuncto vero dicto archidiacono prior de Donesiaco et archidiaconus Pithiveriensis et eorum successores in posterum dictum modium siliginis equaliter dividant et percipiant tempore et loco predictis et ad mensuram prenotatam et sciendum quod per hujusmodi composicionem archidiaconus et prior predicti quitaverunt predictos Odonem et Johannem de omnibus expensis et dampnis factis et habitis a predictis archidiacono et priore occasione dicte contentionis Datum ad peticionem dicti archidiaconi et prioris anno Domini MCCL nono die mercurii post Ramis palmarum mense marcio