Charter Document - 04870297

Universis presentes litteras inspecturis officialis curie Aurelianensis salutem in Domino Noveritis quod constituti coram nobis in jure Hugo dictus Serenne miles de Tesponz et domina Margareta ejus uxor undecim modios bladi et avene medietatem bladi et medietatem avene ad mensuram de Stampis ex parte dicte domine moventes quos habebant annui redditus in grangia decimaria de Mesnilio Giraudi et quicquid juris habebant in eadem grangia vendunt quitant et concedunt in perpetuum viris venerabilibus decano et capitulo Aurelianensibus pro decem et novem viginti libris parisiensium dominium et possessionem dicti redditus in dictos decanum et capitulum transferendo et promittunt per fidem se dictum redditum dictis decano et capitulo gar[ent] itur[os] defensuros et liberaturos in perpetuum ad usus et consuetudines patrie contra omnes et quod redditum predictum et venditionem inde factam facient et procurabunt propriis sumptibus et expensis ipsorum Hugonis et Margarete laudari concedi et admortificari in perpetuum a Johanne de Abbatisvilla armigero secundo domino feudi supradicti et quod dictus dominus promittet per fidem suam se garentire et defendere contra omnes dictis decano et capitulo laudationem concessionem et ad mortificationem predictas tanquam secundus dominus feudi predicti Preterea promiserunt dicti Hugo et ejus uxor per dictam fidem se refusuros dictis decano et capitulo omnia dampna deperdita et interesse pro defectu garentie et liberationis predictarum si contigerit eos deficere in predictis vel aliquo de predictis garentiendis et liberandis et de predictis garentiendis et liberandis et defendendis dederunt tres fide jussores coram nobis videlicet Guillelmum de Meso militem Perrotum Serenne et Guillelmum Serenne armigeros qui coram nobis per fidem se plegios constituerunt ad usus et consuetudines Aurelianenses Preterea promiserunt dicti Hugo et Margareta per fidem se super dicta venditione concessuros litteras fieri sub sigillo reverendi patris domini Senonensis archiepiscopi vel ejus officialis et se daturos ibidem dictos plegios et alios ydoneos super omnibus supradictis Asseruit autem dictus miles per juramentum suum se non credere alios dominos feudales esse in dicto redditu usque ad capitulum Aurelianense quam dictum Johannem de Abbatisvilla et duos alios qui jam dictam venditionem laudaverunt et concesserunt prout inferius plenius continetur Preterea constituti coram nobis Johannes de Belna miles et Ysabellis ejus uxor de cujus capite movet dictum feodum primus dominus ejusdem feudi et Guillelmus de Malisherbis dictus Grierius et Maria ejus uxor tercius dominus feudi predicti ad requisitionem dictorum Hugonis et Margarete dictam venditionem laudantes et spontanei concedentes dictum feudum quod habebant in dicto redditu coram nobis admortificaverunt in perpetuum decano et capitulo supradictis promittentes per fidem suam quod in dicto redditu ratione feudi vel aliqua alia ratione decetero per se vel per alium ratione dotis seu dotalicii vel aliqua alia ratione nichil petent nec petere attemptabunt Promiserunt insuper dicti Johannes de Belna et Ysabellis ejus uxor et dictus Guillelmus et Maria ejus uxor quoddictum feudum et admortificationem super eo factam dictis decano et capitulo in perpetuum videlicet dictus Johannes de Belna miles et Ysabellis ejus uxor tanquam primus dominus feudalis et dictus Guillelmus et ejus uxor tanquam tercius dominus feudalis garentient liberabunt et defendent contra omnes et insuper plegios dederunt videlicet dicti Johannes de Belna et ejus uxor Stephanum Golart de Corciaco Johannem de Belna armigerum filium eorumdem Johannis et Ysabellis Petrum de Borda et Constantium de Graniis et dicti Guillelmus et Maria ejus uxor dederunt magistrum Johannem de Bosumvilla clericum Guillelmum de Alleinvill[a] armigerum et Michaelem servientem Odonis decani Aurelianensis qui plegii ad predicta adimplenda coram nobis se tanquam plegios per fidem suam obligarunt et insuper dicti Johannes de Belna et Ysabellis ejus uxor promiserunt quod altero dictorum plegiorum suorum sublato de medio ipsi alterum eque bonum subrogabunt infra mensera postquam super hoc ex parte dictorum decani et capituli fuerint requisiti et quantum ad omnia et singula supradicta tenenda et adimplenda omnes prenominate persone se jurisdictioni nostre supposuerunt Datum ad preces dictarum partium anno Domini MCCL sexto mense julio die sabbati post festum beati Martini estivalis