Charter Document - 04870290

Universis presentes litteras inspecturis M[anasses] decanus totumque capitulum Sancte Crucis Aurelianensis salutem in Domino Noverint universi quod cum verteretur contentio inter nos ex una parte et Hubertum de Espesonvilla militem ex altera super articulis qui secuntur videlicet quod dictus miles verberavit Petrum Juniorem hominem nostrum in terra apud Villam Galli sita in qua nos habemus omnimodam jurisdictionem et jumentum ejusdem hominis cepit et abduxit in eadem et captum tenuit tempore augusti et ideo peteremus dictam injuriam nobis emendari a milite supradicto usque ad centum libras et expensas inde factas pro rehabendo dicto jumento per ballivum Aurelianensem et dampna exinde habita nobis refundi a dicto milite similiter peteremus usque ad sexaginta libras peteremus etiam nobis restitui possessionem partis cujusdam terre quam dictus miles occupavit et muros quos ibi fieri fecit in prejudicium nostrum demoliri peteremus etiam quod desisteret a perturbatione et impedimento cujusdam semite que solet esse in terra propria ejusdem militis et extendi a villa usque ad aquam ita quod nos et hospites nostri possint libere uti semita supradicta prout solent peteremus etiam quod non ingereret se ad campipartem cum nos usi fuerimus campiparte sine ipso et ejus nuntio peteremus etiam quod quandam partem retractuum aque quam contra inhibitionem nostram fecit excoli seminari et bladum absportari de cujus parte retractus fuimus in possessione nobis restitueret et emendaret Tandem nos et dictus miles super dictis contentionibus compromisimus in nobiles viros Stephanum de Cultura et Guillelmum Manicardi milites promittentes sub pena triginta librarum parisiensium hincinde apposita et per fidem a dicto Huberto prestitam corporalem nos observaturos quicquid dicti Stephanus et Guillermus de dictis contentionibus pace vel judicio duxerint ordinandum vel quicquid dominus Philippus de Marviller desup r electus super predictis duxerit ordinandum si dictos Stephanum et Guillermum in proferendo dicto suo super predictis contigerit discordare Promittimus etiam nos soluturos dictam penam prefato Huberto si contigerit nos venire contra dictum compromissum promisit autem nobis dictus Hubertus se soluturum nobis dictam penam triginta librarum si contingat ipsum Hubertum venire contra dictum compromissum De qua pena ex parte nostra apposita si commissa fuerit dicto Huberto solvenda Therricus Morin et Stephanus Viventis junior civis Aurelianensis se constituerunt fide jussores per fidem suam erga dictum Hubertum de dicta vero pena triginta librarum a dicto Huberto apposita si commissa fuerit solvenda nobis Johannes de Saumeriaco miles et Johannes de Ruppilliaco armiger se constituerunt fide jussores erga nos per fidem suam super hoc specialiter prestitam corporalem Dicti vero Stephanus et Guillermus milites juraverunt super sacrosancta se fideliter de dictis contentionibus veritatem inquisituros et dictas contentiones bona fide et pro posse suo terminaturos infra festum Nativitatis Sancti Johannis Baptiste proximo venturum infra quod festum debet dictum compromissum terminari In cujus rei memoriam et testimonium presentes litteras fecimus sigilli nostri munimine roborari Datum anno Domini MCC quinquagesimo mense januarii