Charter Document - 04870275
| Charter Number: | 04870275 |
|---|---|
| Cartulary Title: | Cartulaire de Sainte-Croix d'Orléans |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1245 |
| Date type: | Internal, Calendar, Papal |
| Resource Link(s): |
Cartulaires d'Île-de-France |
Charter:
Innocentius episcopus servus servorum Dei dilectis filiis decano et capitulo Aurelianensibus salutem et apostolicam benedictionem Cum a nobis petitur quod justum est et honestum tam vigor equitatis quam ordo exigit rationis ut id per sollicitudinem officii nostri ad debitum perducatur effectum Significastis siquidem nobis quod cum ecclesia vestra in qua est certus canonicorum numerus institutus juramento firmatus et per sedem apostolicam confirmatus propter canonicorum absentiam defectum in divinis multotiens pateretur vos ut ad residendum et serviendum libentius in eadem inducantur absentes deliberatione provida una cum bone memorie Phylippo Aurelianensi episcopo statuistis quod singulis canonicis qui divinis intersunt officiis singulis diebus de quibusdam reditibus quos idem episcopus et quidam alii Christi fideles eidem ecclesie ad id contulisse dicuntur certa panis distributio assignetur Et quia iidem redditus non sufficiunt per totius anni circulum ad distributionem hujusmodi faciendam venerabilis frater noster Guillelmus Aurelianensis episcopus pie ac prudenter considerans quod per statutum ipsum in dicta ecclesia cultus divini nominis non modicum ampliatur quandam prebendam in augmentum distributionis ipsius vestro ad id accedente consensu liberaliter deputavit prout in ipsius litteris inde confectis dicitur plenius contineri Vestris igitur petitionibus benignum impertientes auditum quod per vos et eumdem episcopum provide factum est in hac parte auctoritate apostolica confirmamus et presentis scripti patrocinio communimus Nulli ergo [] Si quis autem [] Datum Lugduni VI kalendas augusti pontificatus nostri anno tertio