Charter Document - 04870274

Guillelmus divina miseratione Aurelianensis episcopus universis presentes litteras inspecturis salutem in Domino Significaverunt nobis dilecti filii M[anasses] decanus et capitulum Aurelianense quod cum ecclesia Aurelianensis in qua est certus canonicorum numerus institutus juramento firmatus et per sedem apostolicam confirmatus propter canonicorum absenciam defectum in divinis aliquociens pateretur bone memorie Philippus quondam Aurelianensis episcopus predecessor noster et decanus et capitulum ejusdem ecclesie ut ad serviendum et residendum libencius in eadem canonici inducerentur absentes deliberacione provida statuerunt quod singulis canonicis qui divinis intererunt officiis singulis diebus de quibusdam reditibus quos idem episcopus et quidam alii Christi fideles eidem ecclesie ad id contulisse dicuntur certa panis distributio assignaretur Verum quia dicti redditus non sufficiebant per tocius anni circulum ad distributionem hujusmodi faciendam supplicaverunt nobis dicti decanus et capitulum ut unam de prebendis Aurelianensis ecclesie ad opus panis conferre misericorditer dignaremur Nos vero pie considerantes et oculata fide cognoscentes quod si dicta panis distribucio per totum annum duraret non modicum cresceret et augmentaretur servitium ecclesie memorate cupientes modis omnibus in dicta ecclesia tempore nostro cultum divini nominis ampliari quamdam de prebendis ecclesie Aurelianensis in augmentum distributionis panis dictorum decani et capituli ad id accedente consensu liberaliter et in perpetuum deputamus quam cito offeret se facultas Quod ut firmum et stabile in posterum permaneat presentes litteras sigilli nostri munimine fecimus roborari Actum anno Domini MCC quadragesimo quinto mense junio