Charter Document - 04870241
| Charter Number: | 04870241 |
|---|---|
| Cartulary Title: | Cartulaire de Sainte-Croix d'Orléans |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1236 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Philippus divina permissione Aurelianensis episcopus omnibus presentibus et futuris salutem in Domino Noverint universi quod nos decimam de Gidiaco quam a legatariis bone memorie Philippi quondam Aurelianensis episcopi qui eam acquisierat de mandato ipsius habuimus eisdem legatariis ceutum libras parisiensium persolvendo dedimus et concedimus capitulo Aurelianensis ecclesie perpetuo possidendam et de ejus proventibus eodem capitulo concedente sic duximus ordinandum quod in festo beatorum martirum Mauricii sociorumque ejus quod in eadem ecclesia fiet duplex sexaginta solidi videlicet xl solidi canonicis et xx nutriciis dividentur et die anniversarii nostri xl solidi canonicis similiter parcientur et si proventus dicte decime plus valuerint nutricii usque ad sommam xx solidorum parcient ex eisdem quod amplius fuerit die dicti anniversarii inter canonicos dividendo Si vero successor noster Aurelianensis episcopus voluerit dictam decimam habere poterit dictas centum libras dicto capitulo persolvendo de quibus idem capitulum tenebitur facere emptionem cujus proventus distribuentur prout superius est expressum et quoad vixerimus capitulum memoratum annuatim pro nobis missam de Sancto Spiritu certa die loco anniversarii celebrabit Volumus etiam quod successor noster Aurelianensis episcopus infra annum confirmationis sue teneatur reddere capitulo pro dicta decima centum libras vel eandem capitulo dimittere penitus et quitare Nos autem in predicte donationis et concessionis testimonium presentes litteras sigilli nostri munimine duximus roborandas Datum anno Domini MCCXXX sexto