Charter Document - 04870100
| Charter Number: | 04870100 |
|---|---|
| Cartulary Title: | Cartulaire de Sainte-Croix d'Orléans |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1184 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Ego Stephanus Sancte Genovefe Parisiensis dictus abbas et Petrus decanus Sancti Germani Parisiensis ex delegatione domni pape Lucii tercii cognitores cause que vertebatur inter ecclesiam Sancte Crucis Aurelianensis et monachos Majoris monasterii super ecclesiam de Geona auditis utrinque rationibus et allegationibus susceptis et diligenter examinatis et tandem publicatis attestationibus utriusque partis consilio prudentium et religiosorum virorum canonicos Sancte Crucis absolvimus a petitione monachorum super jure presentationis et institutionis presbiteri in ecclesia predicta Et quum testes monachorum dixerunt Archambaldum presbiterum de Geona per multos annos terciam partem aut quotam volebat oblationum panum et candelarum servientibus monachorum dedisse in quinque festis nec addiderunt cujus auctoritate sive episcopi sive capituli hoc fecisset testes autem canonicorum dixerunt quia duo milites qui prius duas tercias partes quadam antiqua consuetudine que hodie abolita est sententia excommunicationis cogente in manu episcopi de cujus feodo id habebant dimiserint et ipse episcopus et capitulum Sancte Crucis duobus filiis predictorum militum clericis illas duas tercias partes sub annua pensione unius libre cere quam patres eorum episcopo solvere consueverant habere concesserint nos attendentes privatum factum presbiteri non debere prejudic[i]are ecclesie Sancte Crucis simili sententia absolvimus canonicos sive eos qui per ipsos in ecclesia de Geona sunt aut futuri sunt a prestatione illius tercie partis oblationum panum et candelarum quam monachi Majoris monasterii in ecclesia de Geona requirebant Actum anno ab incarnatione domini MC octogesimo IIII