Charter Document - 04870043
| Charter Number: | 04870043 |
|---|---|
| Cartulary Title: | Cartulaire de Sainte-Croix d'Orléans |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1057 |
| Date type: | Internal, A.D., Calendar, Regnal |
| Resource Link(s): |
Cartulaires d'Île-de-France |
Charter:
In Christi nomine Ego Hainricus gratia Dei Francorum rex Notum volo fieri cunctis fidelibus sancte Dei Ecclesie tam presentibus quam futuris qualiter Isembardus Aurelianensis episcopus cum clero et populo sibi commisso nostram serenitatem adiit conquestionem faciens super quadam injusta consuetudine que videbatur esse in ea urbe videlicet de custodia portarum que custodiebantur et claudebantur civibus tempore vindemie et de impia exactione vini quas faciebant ibi ministri nostri obnixe et humiliter deprecans ut illam impiam et injustam consuetudinem sancte Dei ecclesie et illi clero et populo pro amore Dei et pro remedio anime nostre et parentum nostrorum in perpetuum per donarem Cujus petitioni benigne annuens per donavi Deo sibi et clero et populo supradictam consuetudinem et exactionem perpetualiter ita ut nulli amplius ibi custodes habeantur nec porte sicut solitum erat illo tempore toto claudantur nec vinum cuilibet tollatur nec exigatur sed omnibus sit liber ingressus et egressus et unicuique res sua jure civili et equitate servetur Hec autem perdonatio ut firma et stabilis in perpetuum permaneret hoc testamentum nostre auctoritatis inde fieri voluimus subterque sigillo et anulo nostro firmavimus S Ysembardi Aurelianensis episcopi S Henrici regis S Gervasii Remensis archiepiscopi S Hugonis Bardulfi S Hugonis buticularii S Henrici de Ferrariis S Malberti prepositi S Hervei viarii S Herberti subviarii S Gisleberti pincerne S Jordanis cellarii Balduinus cancellarius subscripsit Datum Aurelianis publice VI nonas octobris anno ab incarnatione Domini MLVII Henrici vero regis XXVII