Charter Document - 04860086
| Charter Number: | 04860086 |
|---|---|
| Cartulary Title: | Cartulaire et censier de l'Abbaye Notre-Dame de Morienval |
| Charter Language: | Latin |
| Charter Origin: | Lay |
| Charter Type(s): | Letter of Proxy |
| Date: | 1323 |
| Date type: | Internal, A.D., Feast |
| Resource Link(s): |
|
Charter:
Strenuissimo principi domino suo precipuo domino Karolo comiti Valesie Johanna de Monte priorissa monasterii beate Marie de Morgnevalle ordinis sancti Benedicti Suessionensis diocesis totus que ejusdem loci conventus sue humiles et devote quicquid possunt reverentie et honoris et orationes in Christo assiduas et devotas Cum nostrum monasterium sit ad presens abbatisse regimine destitutum per mortem bone memorie domine Aelidis de Ertry quondam ipsius monasterii abbatisse ne quod absit nostrum monasterium diutius sue viduitatis incommodo deploret ea propter vestre dominationis clementie Notum facimus quod nos dilectos nostros dominum Petrum Tailliofontis curatum et Petrum dictum dou Martroy de Freneto clericum facimus constituimus et ordinamus procuratores nostros veros et legitimos ac nuntios speciales et quem libet eorum in solidum exhibitorem presentium ita quod fiat conditio melior occupantis et non occupantis deterior ad comparendum pro nobis nostro et nostri monasterii nomine coram vobis nec non ad supplicandum vestre dominationi humiliter et devote petendum impetrandum et obtinendum ab eadem vestri gratia licentiam et favorem eligendi in dicto nostro monasterio abbatissam prout jus et ratio suadebunt dantes et concedentes predictis nostris procuratoribus et cui libet eorum per se et in solidum tam communitam quam divisim plenarie potestatem et mandatum speciale premissa omnia et singula faciendi et omnia alia que circa hec et in hus necessaria fuerint et occurrerint facienda ac viderint opportuna et que nos faceremus seu facere possemus et deberemus si presentes essemus etiamsi mandatum aliud exigant speciale ratum et gratum habentes et habiture quicquid per dictos procuratores nostros aut per eorum alterum in premissis et pertinentibus ad eadem actum supplicatum impetratum dictum fuerit et obtentum bene et diu valeat vestra dominatio in domino Jesu Christo In cujus rei testimonium sigilla nostra quibus ad presens utimur presentibus litteris duximus apponenda Datum anno Domini millesimo trecentesimo vigesimo tertio die jovis ante festum Ascensionis ejusdem