Charter Document - 04860084
Charter Number: | 04860084 |
---|---|
Cartulary Title: | Cartulaire et censier de l'Abbaye Notre-Dame de Morienval |
Charter Language: | French |
Charter Origin: | Lay |
Charter Type(s): | Confirmation |
Date: | 1320 |
Date type: | Internal, A.D., Feast |
Resource Link(s): |
Cartulaires d'Île-de-France |
Charter:
A tous ceus qui ces presentes verront et orront Flourens de Jaus demeurant à Roye garde de par le Roy dou seel de la baillie de Vermandois establis a Roye salut Sachent tuit que nous en l'an de grace mil trois cent et vint le jour de feste sainte Crois en septembre receumes les lettres de noble sage et puissant Monseigneur Jehan seigneur de Saillenay chevalier le Roy Bailli de Vermandois saines et entières contenans la fourme qui s'en sieut Jehans sire de Saillenay chevaliers le Roy garde de la Baillie de Vermandois a Flourens de Jaus bourgeois de Roye commissaire sur le fait des acques des Églises et des acques fait des choses de fié tenues de personne non nobles establis par nous seur le fait dessus dit salut Nous vous mandons et commettons que vous vous enfourmez diligemment des acques que l'église de Morgneval a acquis puis soissante ou cinquante ans en ça et lesdis acques tenez en la main du Roy notre seigneur et les hiretages que vous trouverez qui sont acquis avant le temps dessus dit ou qui seront de la fondation de l'église dessus dite delivrez à lade eglise sans delay Donné à Montdidier le jour de la fête sainte Crois ou mois de septembre l'an de grace mil trois cent et vint Par la vertu desqueles Lettres nous avons enquis diligemment à plusieurs personnes anciennes dignes de foy examinéez et juréez estroitement se ladite Église a rien acquesté puis le temps dessus dit liquel nous dirent et tesmoignerent par leurs loyaus creans et sairements que non pour coi a ladite Église nous delivrons et avons delivré tous les biens estans en la Prevosté de Roye dessus dite appendans a icele Église En tesmoing de ce nous avans mis en ces presentes lettres ledit seel de la baillie establi à Roye sauf le droit le Roy et l'autruy Ce fu fait le Mercredy après feste sainte Crois en septembre et en l'an dessus dit