Charter Document - 04860083
| Charter Number: | 04860083 |
|---|---|
| Cartulary Title: | Cartulaire et censier de l'Abbaye Notre-Dame de Morienval |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1319 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Philippus dei gratia Francorum et Navarre Rex Notum facimus universis tam presentibus quam futuris quod nos dampna considerantes gravia que religiose mulieres abbatissa et conventus monasterii beate Marie de Morgnevallis in terrarum suarum foreste nostre Cuisie contiguarum fructibus qui per feras ipsius vastantur habuerunt hactenus substinere nec non attentis aliis quibus dicte religiose subjacent incommodis inopie compatientes earumdem religiosis ipsis pietatis intuitu ob nostre parentum que nostrorum animarum remedium et salutem concedimus de gratia speciali quod ipse earum que successores pullos jumenta boves vaccas et vitulos proprios earumdem ad depascendum in locis alte foreste nostre predicte possint singulis annis imperpetuum ponere et tenere libere et sine prestatione redibentie cujuscumque Dantes presentibus in mandatis magistris forestarum nostrarum Necnon dicte foreste nostre Cuisie custodibus et servientibus modernis et qui pro tempore fuerint ut dictas religiosas supra hoc non impediant nec impediri permittant Quod ut ratum et stabile perpetuo perseveret presentibus litteris nostrum fecimus apponi sigillum Actum apud Regalem locum prope Compendium anno Domini millesimo trecentecimo decimo nono mense augusto