Charter Document - 04850114

Jehan de Blaise seigneur de Villeconte maistre et enquesteur des eaux et foretz du roy nostre sire ès pays de France Champagne et Brye au maistre et garde de la forest de Rouvray et garenne de Saint Cloud sallut Veue par nous la requeste des relligieuses abbesse et couvent de Montmartre lez Paris contenant que elles disent avoir au temps passé de l'heritaige de l'eglise certaine quantité de terres labourables depuis la Croix de Fust jusques au chesne de la queue du boys contenant quarante arpens de terre ou environ joignant au boys du roy de ladicte forest esquelles terres labourables dessus déclarées appartenant ausdictes dames comme elles disent les bois du roy sont agectez et accreuz en leurs dictes terres si comme disent icelles relligieuses abbesse et couvent et aussy veu l'informacion sur ce faicte et par ladvis et délibération du conseil advocat et procureur général du roy nostredict seigneur en Parlement Nous à icelles religieuses abbesse et couvent avons donné et donnons congé par ces présentes de faire labourer esdictes terres coupper et exploicter le boys dicelles en et soubz la main du roy nostredict seigneur et de nous à leur caution jusques à ce que par nous en soit autrement ordonné au proffict de qui il appartiendraet sans préjudice du droict et propriété de la chose et des partyes Si vous mandons qu'à icelles religieuses abbesse et couvent laissez joir desdictes terres et boys par la manière dessus dicte Donné soubz le scel de nostredict office le dix septième jour de Octeubre lan mil IIII vingt quatre Signé Le Tuit et scellé à double queue de cire verd