Charter Document - 04850105

A tous ceulx qui ces presentes lettres verront Jehan [] chevalier du roy nostre sire garde de la prevosté de Paris salut Savoir faisons que par devant nous vindrent en jugement Jehan Pepin escrinier et Anscelette sa femme de luy souffisamment quant à ce auctorisée et recongnurent en droit eux ensamble et principalement chascun pour le tout et pour leur cler et évident profit apparant si comme ils disoient avoir pris et retenu pour eulx et pour chascun d'eulx et pour le tout desores en droit durant le cours de leurs vies et du survivant d'eulx deux de religieuses dames et honnectes madame l'abbesse et tout le couvent des religieuses monseigneur sainct Denis de Montmartre une vouste toute telle si comme elle se comporte sextendant en long et en lez en hault et en bas avecques tous ces drois venues entrées yssues et quelconques appartenances que lesdictes religieuses ont de leur demaine propre assize en la ville de Paris devant et à l'opposite de la porte du Chastelet tenant d'une part à la voulte de sainct Eloy de Paris et d'autre part à une voulte que tient Martin Le Chartier pour ycelle voulte par eulx prise cy dessus avoir tenir et posséder [] le cours de la vie ou des vies d'eulx deux et du survivantdurant en quelque estat habit ou prophécie quils soient ou deviengnent Cest assavoir ceste presente prise faicte pour et parmy douze livres parisis de cens ou rente annuel quils en promisrent et gaigairent chascun pour le tout par eulx et leurs ayans cause rendre et payer desore en droit chascun an [] par les quatre termes en lan généralement à Paris accoustumés [] En tesmoing de ce nous avons à ces lettres le seel mis de la prevosté de Paris à l'an mil trois cens soixante et deulx le Jeudi vint et troisiesme jour de Juing vigille de sainct Jehan Baptiste