Charter Document - 04850100

A tous ceulx qui ces lettres verront Guillaume Gormont garde de la prevosté de Paris salut Savoir faisons que par devant nous vint en jugement Jehan Champdavoine d'Antogny boucelier et Jehenne sa femme à laquelle il donna auctorité souffisante quant à ce et recongneurent et confessèrent en droit nous avoir pris et retenu à tiltre de rente d'argent ou cens pour eulx et pour ceulx qui d'eulx auront cause doresnavant durant la vie d'eulx deux et du survivant d'eulx de religieuses personnes et honnestes l'abbesse et couvent de Montmartre la voulte de pierre excepté le petit ouvroir de dessoubz partie que tiennent Simon Coste tornelier et Jehenne sa femme que ycelles religieuses ont sur le chastelet de Paris tenant ycelle voulte à la voulte de saint Eloy cest assavoir pour et parmy la somme de dix livres parisis de droite rente d'argent ou cens que yceulx mariez engaigent en nostre main et promisrent pour eux et pour les ayant cause d'eulx rendre et payer ausdites religieuses à leur certain commandement ou au porteur de ces lettres chascun an doresnavant aux quatre termes en l'an à Paris acoustumés durant la vie desdits mariez et du dernier vivant d'eulx seulement en telle manière que yceulx prenans et leurs hoirs seront tenus de rendre yceluy ouvroir au tel point et estat comme il est de présent et avecques ce vouldrent et accordèrent yceulx preneurs que sil deffailloient de payer ladicte rente ou d'un terme de paiement dycelle que ycelles religieuses et leur certain mandement ou le porteur de ces lettres s'il leur plaist les puissent mestre et bouter hors dudit ouvroir et volte [] En tesmoing de ce nous avons mis en ces lettres leseel de la prevosté de Paris l'an de grace mil troys cens quarantequatre le jeudi dixseptiesme jour de Juing