Charter Document - 04850098

A tous ceulx qui ces presentes lettres verront Jehan de Montengny garde de la prevosté de Paris salut Nous faisons assavoir que pardevant nous vindrent Jehan Paon et Jehenne sa femme [et] affermèrent pardevant nous que il avoient prenoient et recepvoient paisiblement chascun an aux quatre termes à Paris accoustumés soissante solz parisis de cens ou de rente perpétuelle qui leur fut assise de Thovinien le Guenier au traicté de leur mariage et leur avoit ledit Thovinien promis a garantir si comme il disoit que mention en estoit faicte en lettre de l'official de Paris c'est assavoir sur une pierre à poisson assize à Paris entre la pierre Estienne Le Picart et la pierre Sambourt la femme Gile Homont en la censsive de l'église de Montmartre tantost après troys solz de fons de terre et trente et deux solz parisis de cres de cens si comme ils disoient Lesquels soixante solz parisis de cens ou de rente ci dessus dits et tout le droit toute l'action la propriété et possession que les devant ditz Jehan Paon et Johenne sa femme y avoient et povoient avoir par quelconque raison que ce fust es soixante solz parisis de rente dessus dits iceulx Jehan Paon et Jehenne sa femme recongnurent en droit par devant nous eux pour leur profit et de leur commun assentement sans force et sans fraude avoir vendu et par nom de pure vente perpétuellement quittez et délaissez paisiblement a tousjours des ores en droit à Petronille Dasche nonnain de Montmartre et a ceulx qui auront cause de luy à prendre et recepvoir paisiblement doresnavant de ladicte Pétronille ou de son commandement les soixante solz parisis de cens ou de rente dessus dits sur ladite pierre au poisson ainsi comme est devisé par dessus tout le cours de la vie de ladicte Pétronille en quelconque estat quelle soit saine ou enferme et après le décès de ladicte Pétronille yceulx soixante solz parisis de cens ou de rente dessus dits vertiront aux dames de Montmartre perpétuellement pour leurs vestiaires si comme lesdits Jehan et sa femme disoient et promisrent par leur serment lesdits Jehan Paon et sa femme que contre ceste vente ne viendront ne venir feront desormès en avant Pour laquelle vente dessusdicte euissent accordée et faite les devant dits Jehan et Jehenne avoient euz et receuz de ladicte Pétronille trente et cinq livres en parisis en bons deniers contanz dont ils se tindrent bien apayez en jugement par devant nous renonçant expressément à l'exception de ladicte somme d'argent dessus dicte non eue et non receue pour la cause de cette vente du tout en tout Et les soixante solz parisis de cens ou de rente dessusdits ainsi vendus prosmisrent par leur serment corporel à garantir à deffendre et à délivrer à leurs cousts a ladicte Pétronille et à ceulx qui auront cause de luy ainsi comme il est devisé par dessus aux us et coustumes de France contre tous et rendront et payeront à ladicte Pétronille ou a ceulx qui auront cause de luy sept livres parisis en non de paine se il estoient retirant en tout ou en partie avecques tous les aultres drois coustemens Et pour la chose dessusdicte tenir garder et garantir fermement et léaument les devant ditz Jehan Paon et sa femme ont obligés et soubmis envers ladicte Pétronille et envers ceulx qui auront cause de luy eulx et leurs hoirs et tous leurs biens meubles et immeubles présens et advenir ou quil soient a justicier au prevost de Paris ou par la juridiction soubz qui ils seront trouvés Espécialement il leur ont bailhé et obligé contre plege deux arpens et demy de vingnes assisà Gentilli mouvant de l'heritaige dudict Jehan dont il y a cinq quartiers en la censive maistre Jehan de Grantpont chanoyne de Paris et demy arpent ou fié l'évesque de Paris et troys quartiers mouvans du prieur de la Chartre si comme ils disoient jusques à la garantise de la vente dessusdicte [] En tesmoing de ce nous avons mis en ces lettres le scel de la prevosté de Paris en l'an de grace mil deux cens quatre vint et dix ou moys de Novembre le dimanche devant la feste sainct André l'apostre