Charter Document - 04850032

Ego Mauricius Dei gratia Parisiensis episcopus notum fieri volumus universis tam presentibus quam futuris quod cum sorores ecclesie Montismartyrum antiquitus egrotari solerent et cum communi victu refectorii ad convalescendum non possent refici domina Ada ejusdem ecclesie abbatissa et domina Constancia soror regis Francie comitissa Tholose ex sola caritatis dilectione promote unde aliquando fragilitati humane egritudinis succurrerent devote instituerunt In hac institutione que vocatur infirmaria domina Ada predicta abbatissa assensu tocius capituli de premio domus parvi pontis viginti solidos censuales singulis annis assignavit Domina vero Constantia soror regis Francorum qui viderat plerasque sanctimonialium sorores in infirmitate suorum corporum laborare et innumerabiles penurias tolerare sperans et expectans in futura vita participare mercedem beneficiorum que fiunt in predicta ecclesia vigiliis jejuniis orationibus et elemosinis sive quibuscumque modis fiant decem solidos et VIIII denarios censuales quos habebat ad Aubertum Vilare quos emerat de dominio suo a domino Hugone magno de Calliaco cum justicia terre illius pro qua census iste redditur ad confortandum sorores institute infirmarie concedendo et laudando donavit Sed si alibi decem solidos predicte infirmarie assignaret ipsa domina Constantia illos predictos decem solidos ad usus suos vellet retinere Eodem tempore dominus Remondus preceutor Compendii et fratres sorores[que] ipsius pro anima patris sui qui tunc temporis nuperrime obierat et pro animabus omnium antecessorum suorum et omnium fidelium defunctorum unam fenestram qua panis venditur que est ad portam Parisius predicte infirmarie donaverunt et concesserunt et laudaverunt et per Thomam divitem qui teme Parisius prepositus erat dominam Adam predicte ecclesie abbatissam de fenestra illa investiri fecerunt Item predicta Constantia soror regis Francie dat ecclesie Sancti Dyonisii de Monte martyrum molendinum quoddam et piscaturam ejusdem molendini quod videlicet molendinum a sanctimonialibus Ederensis abbatie sibi emerat situm apud Clichiacum Hec itaque tali pacto dat quod decem et octo sextarii annone quales molendinum predictum lucratum fuerit reddantur inde Helisabeth nepti sue per singulos annos quamdiu ipsa vixerit medietatem tamen predicte piscature reddi disponit simul eidem Helysabeth aliam medietatem ecclesie habendam Si autem ipsa Helysabeth ante eam decesserit prefata annona et medietas piscature ipsi Constantie dum vixerit remanebunt Postquam vero utraque decesserit supradictum molendinum cum annona et piscatura domui infirmarie supra nominate ecclesie remaneat in posterum tali videlicet conditione quod singulis annis custos domus infirmarie duodecim solidos in die anniversarii ipsius Constantie ad quamdam pitantiam refectorio faciendam reddat Hec autem omnia facta sunt assensu domine Ade ejusdem ecclesie abbatisse et totius conventus Et ut hec rata et inconcussa teneantur in perpetuum domina Ada abbatissa et domina Constantia soror regis Francie que tunc temporis in Montemartyrum morabatur sigilli nostri auctoritate et testimonio sigillorum suorum presens scriptum sub anathemate muniri rogaverunt Actum anno incarnati Verbi MCLXXI episcopatus vero nostri anno XI