Charter Document - 04850006

Innocentius episcopus servus servorum Dei dilecte in Christo filie Christiane abbatisse Monasterii Sancti Dionysii Montismartyrum ejusque sororibus tam presentibus quam futuris in [] Pie postulatio voluntatis effectu debet prosequente compleri quatenus et religionis sinceritas laudabiliter enitescat et utilitas postulata vires indubitanter assumat Nec enim gratus Deo aliquando famulatus impenditur si non caritatis radice procedens a puritate religionis fuerit conservatus ea propter dilecte in Domino filie vestris justis desideriis accommodamus assensum atque juxta petitionem gloriosi filii nostri Ludovici Francorum regis et illustris regine Adelaidis uxoris sue monasterium beati Dionysii Montis martyrum utriusque largitione pro animarum suarum salute et peccatorum remissione ditatum in quo nimirum divinis estis famulatibus mancipate apostolice sedis privilegiis communimus inprimis siquidem statuentes ut Ordo monasticus secundum beati Benedicti regulam ibidem in perpetuum conservetur atque in eodem loco per sanctimoniales honeste conversationis et vite laudabilis omnipotenti Domino de cetero serviatur Porro quecumque possessiones quecumque bona ab eodem rege sive regina seu ab aliis Dei fidelibus pie devotionis intuitu sunt collata universa etiam que in futurum concessione pontificum liberalitate regum vel principum oblatione fidelium seu aliis justis modis divina suffragante clementia idem venerabilis locus poterit adipisci firma vobis perpetuis futuris temporibus et intemerata serventur Vestra itaque interest ut quanto estis a curis secularibus libere et sancte romane ecclesie salubri patrocinio communite tanto majori devotione divinis obsequiis insistatis atque de virtute in virtutem cooperante Domino conscendentes summo Pastori magis ac magis de die in diem complacere curetis Decernimus ergo ut nulli hominum fas sit vestrum monasterium temere pertubare aut ejus possessiones auferre vel ablatas retinere minuere seu quibuslibet infestationibus fatigare sed omnia eidem loco illibata integraque permaneant ancillarum Christi pro quarum gubernatione et sustentatione concessa sunt usibus profutura Si qua igitur in posterum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita et non reatum suum congrua satisfactione correxerit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore et sanguine Dei ac Domini redemptoris nostri Jhesu Christi aliena fiat atque in extremo examine districte ultioni subjaceat Cunctis autem eidem monasterio justa servientibus sit pax Domini nostri Jhesu Christi quatenus et hic fructum bone actionis percipiant et apud districtum judicem premia eterne pacis inveniant Amen amen amen + Ego Innocentius Catholice Ecclesie episcopus + Ego Gregorius diaconus cardinalis tt SS Sergii et Bacchi + Ego Guido cardinalis diaconus tt Sancti Adriani + Ego Hubaldus diac card tt Sainte Marie in via lata + Ego Grysogonus diac card tt Ste Marie in porticu + Ego Guido Tiburtinus episcopus + Ego Ansolri presb card tt S Laurentii in Lucina + Ego Lucisred presb card tt Vestine + Ego Lucas presb card tt SS Joannis et Pauli + Ego Gs presb card tt S Prisce Datum Parisiis per manum Aimerici sancte romane ecclesie diac card et cancellarius Kal Octobris indict XV Incarnationis dominice anno MCXXXVII pontificatus vero Domini Innocentii Pape II anno VII