Charter Document - 04840015
| Charter Number: | 04840015 |
|---|---|
| Cartulary Title: | Cartulaire de Saint-Thomas d'Épernon et de Notre-Dame de Maintenon |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1237 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Ego Almaricus dominus de Metenon notum facio [] quod ego et Emelina uxor mea dedimus ecclesie beate Marie de Metenon pratum quod emimus a defuncto Stephano Le Bochier quod continet unum arpentum et dimidium situm parum ultra ecclesiam beati Petri de Metenon juxta aque decursum et concessimus pro quatuor denariis censualibus annuatim in festo sancti Remigii perpetuo persolvendis Ita tamen quod prior et monachi pro tempore in ecclesia beate Marie Deo servientes tenebuntur querere duos cereos unam libram cere et dimidiam continentes qui ardebunt ad omnes missas que ad altare beate Marie de cetero per Dei gratiam celebrabuntur Similiter et in festis sollempnibus videlicet in Natale Domini in Pascha in Pentecoste in festo Omnium Sanctorum et in festo beate Marie dum matutinorum officium vesperarum et missarum Domino sollempniter persolvetur Tenebuntur etiam monachi anniversarium meum et anniversarium Emeline uxoris mee cum nos ab hoc seculo migrare contigerit annis singulis in perpetuum celebrare Quod si forte monachi ab hiis que supra diximus convicti deficere viderentur pratum predictum ad nos vel heredes nostros libere reverteretur ut de eo duos cereos ad serviendum altari beate Marie ut dictum est quereremus Istud autem voluit et approbavit Almaricus filius meus primogenitus In cujus rei testimonium presentes litteras priori et monachis de Metenon sigillorum nostrorum impressionibus dedimus roboratas Actum anno Domini millesimo ducentesimo tricesimo septimo mense Septembri