Charter Document - 04830088

A tous ceuls qui cestes presentes lettres verront et orront Pasquier Le Fèvre Prévost d'Espernon salut Saichent tuit que en la présence Thénot Paris clerc juré et tabellion de la chastellenie dudict lieu establi ad ce faire vint et fut présent en sa personne si comme ledit clerc juré nous rapporta Guyot Berruyer lequel estant en bonne santé de certeine science de bonne mémoire et prospérité si comme il apparoit de sa bonne pure franche et libéral volenté non pas à ce contraint si comme il disoit recognut et confessa lui avoir vendu et en nom de pure vente perpetuellement avoir octroyé quicté cessié et déleissé desorendroit du tout en tout à touz jours mès a religieux homme et honeste maistre Jehan de Maintenon humble prieur du prieuré Saint Thomas d'Espernon de l'ordre de Maire Moustier en Tourainne abssent ung arpent de terre tenant a la rivière appelée le Baingnoer aus moines d'Espernon d'une part et aus terres dudit religieux d'autre part avecques ce environ trois quartiers de terre tenant d'une part à la terre dudit prieur et d'autre part aus courtilz de Vynerville tout mouvent de son acquerment fait avecques et en la compaingnie de Marion jadis sa fame tout tenu du dit prieur à telx cens comme tout doit pour le pris et somme de sexante livres tournois monnoye flèbe dont le dit Guyot vendeur se tint enterignement a paié [] Tesmoing le scel de la dite chastellerie à la relacion dudit clerc juré l'an de grace mil trois cenz quarante et trois le samedi vinteunyesme jour du mois de février