Charter Document - 04830070

Marie par la grâce de dieu Roine de France A touz ceus qui ces présentes lettres verront salut Comme le baillif de Montfort procureur de nostre chière et amée cousine la duchesse de Bretaigne nous requeist ou non de la dite duchesse auoir la court et la congnoissance pour reson du chastel de Montfort de plusieurs cas et articles ci dessouz nommez des quieus nostre baillif de Mante metoit empeschement en disant que à lui en son siège de Mante appartenoit la court et la congnoissance diccus et que illeuques deuoit demourer Sachent tuit que nous sus les diz cas et articles auons veu et regardé en consueil et deliberation par nostre noble consueil en la manière qui ensuit Premièrement le prieur d'Espernon procureur de Mèremoustier se douloit et requèroit que comme il eust esté anciannement pour lui et pour séglise d'Espernon en saisine destre gardez par le siège du chastel de Nogent et par le préuost de ce lieu toutes foiz que les cas si estoient eschoiz et contrinz feust daler à Mantes et destre gardé par le siège de Mantes ou grief et préjudice de lui et séglise et ou grant dommage Et le dit prieur nous eust requis par plusieurs foiz que par le siège de Nogent feust gardé et tenu en sa saisine destre gardé par le préuost de Nogent et le deuant dit procureur à la dite Duchesse proposast au contraire que les genz à la Contesse d'Aubemalle du chastel d'Espernon estoient en saisine que toutes foiz que le dit prieur ou non de séglise se vouloit douloir de la gent à la dite contesse d'Aubemalle de griès ou dautres choses que illi eussent fez à lui ou à ses hommes que il estoit traitiez au siège de Mante et illeuques deuoit demourer Pour quoi requeroit le procureur de la dite Duchesse que comme la dite Contesse d'Aubemalle feust en la foy de la dite Duchesse du chastel d'Espernon et se ressortissist devant li à Montfort que aussi comme la dite Duchesse se ressortissoit à Mante deuoit demourer la dite Contesse au siège de Mante et le dit prieur si disoit que se traitié auoit esté à Mante ce aououit esté depuis ceu que une grâce qui donnée fu du Roy nostre sire à la dite Duchesse que la Contesse d'Aubemalle qui à ce temps se ressortissoit à Nogent se ressortissist à Montfort et de Montfort à Mante aussint comme le dit chastel de Montfort fesoit et que de ce auoit bien fet touz jours le dit prieur retenne que il ne li feist préjudice et que requis nous auoit destre gardez en sa saisine par le chastel de Nogent et de quoi nous feusmes bien recordant que commandement auions fet au dit prieur que seurement il alast soy ressortir à Mante sans ce que il li feist aucun préiudice et que le plus toust que nous pourrions auoir deliberation de parler au Roy nous saurions questoit la volenté du Roy du dit ressort et ce seu nous li ferions droit Tout oui ce qui proposé estoit d'une part et d'autre veu les lettres le Roy à nous enuoiées sur ceu et la grâce que le Roy auoit donnée à la dite Duchesse du deuant dit ressort d'Espernon dit fu et par arrest que de la saisine dont la dite Duchesse se vouloit aidier que le dit prieur afin que il demourast du ressort de Mante depuis la dite grâce donnée du Roy la dite Duchesse deci en avant ne sen pourra plus aidier enuers ledit prieur mès se la dite Duchesse veust monstrer le dit prieur appelé que anciannement le dit prieur se ressortissist à Mante elle y sera receue et aussi se le dit prieur veust monstrer que anciannement il se ressortissist au châtel de Nogent il y sera receuz et sus ceu les enquestes faites droit et sera Item le procureur de la dite Duchesse requeroit à nous la court et la congnoissance dune demande que le dit prieur d'Espernon fesoit au baillif de la Contesse d'Aubemalle de ceu que il disoit que comme il s'église et ses hommes feussent en lespécial garde de nous et en saisine destre gardez par nous et en sa tierre feust venuz le dit baillif d'Espernon eust pris un homme pour le fet dune occision et iceli pendu et tuié sanz lay et sans jugement ou grief du dit prieur et de s'église que cette congnoissance lui deuoit appartenir et deuant li deuoit aler le dit prieur et ce requerre mesmement quie le dit procureur maintaigne que le dit homme fu pris en la terre du dit prieur pour soupecon de murtre de quoi la congnoissance en appartenoit à la contesse d'Aubemalle et nostre dit baillif proposoit et disoit afin que la congnoissance de ceu li demourast que le cas dessus dit estoit occision et que débat en estoit entre le dit prieur et la dite contesse à sauoir se le cas estoit occision ou murtre Et que du dit débat pour la reson du dit prieur lequel est en nostre espécial garde la congnoissance en appartenoit à nostre dit baillif à sauoir se le fet estoit occision ou murtre et disoit nostre dit baillif que enqueste seu estoit faite sauoir se le cas estoit occision ou murtre du consentement du dit prieur et du baillif à la dite Contesse par quoi disoit nostre dit baillif que parmi la dite enqueste len pouet venair clèrement à sauoir se le fet est occision ou murtre Tout oui ce qui proposé estoit dune part et dautre dit fu et par arrest que la dite enqueste sera ouuerte et se jugera à fin deue Item le procureur de la dite Duchesse nous requèroit la court et la congnoissance du préuost d'Esparnon dune demande que le charron du bourt Saint Thomas fesoit au dit préuost deuant nostre dit baillif de ce que il auoit pris et emporté les houstinz du dit charron ce que il ne pouet ne ne deuoit et requeroit à notre dit baillif que par lui li feussent délivrez Et disoit le dit procureur à la Duchesse que le dit charron estoit franche personne et que deuant le baillif à la dite Contesse ou deuant son dit préuost auoit requis la déliurance de ses hostinz Et que acepté les auoit à juges et entré en procès pour prendre droit deuant eus pour quoi la congnoissance en deuoit estre rendue à la dite Duchesse comme la dite Contesse pour reson de son chastel d'Espernon se ressortissist à Montfort Et nostre baillif proposoit et disoit afin que la congnoissance de ce li eu deust demourer que le dit charron estoit hoste couchant et leuant au dit prieur lequel prieur estoit en nostre garde espécial lui et ses hommes et en saisine destre gardé par nous Et que toutes foiz que empeschement lui estoit mis à lui ou à ses hommes par nous estre ostez et se disoit nostre dit baillif que le dit prieur sestoit adjoint en procès avecques le dit charron son homme afin que la franchise que ses hommes auoient par nous leur pouist estre gardée Tout oui ce qui proposé estoit dune part et dautre dit fu et par arrest que se le dit bailif à la Contesse ou son préuost pouaient prouuer que le dit charron en tant que il est franche personne eust requis deuant iceus des hostienz et lui mis en procès pour prendre droit deuant eus que la congnoissance leur en demoura pour tant quie au dit charron touche et se il ne le peuent prouuer la court et la congnoissance en demourra pardeuers nostre dit baillif pour tant que le dit prieur qui en notre garde est sest adioint aueiques le dit charron les quèles choses dessus dites nous certefions par naus lettres seellées de notre propre seel Données lan de grâce mil trois cenz et treize le mercredi avant la feste Saint Denis