Charter Document - 04830058

Universis presentes litteras inspecturis Ferrandus illustris regis Hyspanie filius heres Pontivii et dominus Sparnonis ac miles et domina Laura de Monteforti ejusdem Sparnonis domina ejus uxor salutem et amorem in Domino Noveritis quod cum inter nos ex una parte et religiosos viros abbatem et conventum Majoris Monasterii Turonensis priorem et monachos Sancti Thome Sparnonensis ex altera contentio verteretur super eo quod ipsi asserebant et dicebant per totam terram suam sive infra fines totius territorii sui intra fines castellanie Sparnonis existentes ratione dominii aut domanii aut aliquo jure alio ad eos pertinente omnem justitiam tam altam quam bassam se debere habere et quod erant in possessione vel quasi hujusmodi justitiam explectandi et super claiis sive clausura stagni quod est eorumdem monachorum de Sparnone quas asserebant se habere posse et tenere et eis ad arbitrium reparare quando et quotiens et qualiter sibi expedire videbant et etiam super eo quod ipsi dicebant quod quinque solidos parisienses censuales quos percipere consueveramus ab hospite mansionario in quadam domo sita in burgo Sancti Thome Sparnonensis contigua muris nostris Sparnonis que domus Antiochia vulgaliter appellatur percipiebamus ratione contiguitatis hujus muri et per eo quod in parte erat fixa et injuncta in muris predictis non ratione situs domus ejusdem nobis contrarium asserentibus et dicentibus premissa ad ipsos religiosos prout dicunt et asserunt minime pertinere Tandem ducti consilio saniori cum nobis constet et liqueat per fide dignos quod justitia omnis et vigaria per totam terram ipsorum religiosorum in castellania existentes et etiam infra fines territorii eorumdem ad ipsos religiosos pertineat eandem ipsis dimisimus dimittimus concessimus et concedimus exercendam per se et suos et omnimodo explectandam etiam de furto latrocinio verbis contumeliosis verberibus et omnibus aliis ad justitiam quoquo modo pertinentibus exceptis tantum modo hiis tribus casibus raptu murtro enciso quos ad nos et heredes nostros solum et expressim et specialiter retinemus per totam terram ipsorum intra fines castellanie predicte cum mobilibus eorumdem malefactorum absque contradictione aliqua In hereditatibus autem illorum malefactorum rebus immobilibus existentibus in terra seu in dominio sive infra fines territorii monachorum predictorum nos nec heredes nostri aliquid reclamare vel habere non poterimus sed erunt ipsorum religiosorum in tribus casibus supradictis Item decimas molendinorum nostrorum quas ipsi habent et decimum mercatum quod ipsi similiter habent et possident secundum quod tempore antecessorum nostrorum habere et possidere consueverant item justitiam nemorum predictorum de Champ Gaudeim nobis retinemus eo modo et secundum quod in litteris comitis Amaurici patris predicte nobilis domine plenius continetur Tota autem alta justitia et quicquid ad eam pertinet per totam terram suam sive sit in eorum dominio aut domanio censiva feodo aut qualicunque modo ad ipsos pertineat dictorum religiosorum erit qualiscunque et qualicunque modo fuerit et ubicumque et quandocunque et deducetur atque determinabitur coram ipsorum judicibus suis ballivis et in curia sive curiis eorumdem et pre ipsos sive ipsorum mandatum exequetur et in ipsa justitia sive ipsorum hospitibus mansionariis aut aliis personis in terra sive infra fines territorii predictorum religiosorum commorantium aut manentium in dicta castellania nos sive heredes aut successores nostri aliquid justitie reclamare non poterimus vel habere nec omnino aliquid justicie retinemus in dicto prioratu seu terra ad eumdem prioratum pertinente exceptis in tribus casibus supradictis Preterea volumus et concedimus quod claias sive clausuram claiarum stagni quod est ipsorum monachorum intra stagnum et fossatum situm vel subtus castrum de Sparnone faciant teneant habeant ac possideant et eas refacere et reparare possint claias sive haias faciendo ibidem quando et quocienscunque et qualiter cunquomodo sibi videbitur expedire usque ad muros castri nostri Sparnonensis a meta in dicto stagno monachorum posita Usque ad aliam metam positam in terra sive ortis dicto fossato adherentibus imperpetuum libere pacifice et quiete Et si aliquis habens terram prope dictum stagnum aperuerit vel effoderit terram suam adeo quod aqua dicti stagni ibidem intraverit dicti religiosi poterunt claudere si voluerint stagnum suum ibidem vel sequi pisces suos si maluerint et piscare in fossato sic facto Insuper quinque solidos parisiensium prenotatos census annui quos percipere consueveramus super domo predicta ut dicebamus que Antiochia appellatur et quicquid juris justicie aut explectamenti in ipsa et commorantibus in eadem eisdem religiosis pure et simpliciter donamus remittimus et quitamus volentes et concedentes quod ipsam domum in statu in quo esse diutius consueverit dictis nostris muris contiguam ipsam vel alteram et ligna dicte domus et que necessaria erunt ad edificationem ipsius infigere et immitere possint prout consueverunt ponere et prout alias factum fuit vel eam denuo dum voluerint redificare Idem vero religiosi quantum ad hoc nolentes existere ingrati in recompensatione dicte domus et platee in qua sita est et omnium jurium que in ipsa poteramus quoquo modo habere que ut dictum est eisdem monachis dedimuset adhuc damus in puram et perpetuam elemosinam nobis et heredibus nostris assignaverunt quatuor solidos turonenses quos ipsi habebant annui census in domo Radulphi de Brione que domus sita est inter domum defuncte Marie La Gatote ex una parte et domum filiastrarum Testart ex altera et decem denarios quos habebant a majore de Poignies in terris vineis et masuris quibusdam quas Johannes de condeto tenet similiter decem denarios turonenses annui census quos Petrus dictus Chardonel debebat eisdem de eisdem rebus similiter et septem denarios turonenses quos castellanus noster Gilo de Sancto Curto debebat eisdem monachis et adhuc remanent illis monachis tres denarii super eodem Gilone turonenses in eisdem rebus predictis tenendi et possidendi a nobis et nostris heredibus in perpetuum pacifice et habendi cum omni jure et dominio quod ibidem habebant cum predictis tribus casibus qui superius exprimuntur Actum etiam inter nos et et religiosos predictos quod ipsi seu eorum mandatum non poterunt pendere seu pendifacere latronem seu malefactorem aliquem nisi ad furcas Sparnonis communes nobis et dictis religiosis in territorio quod vulgaliter appellatur Potin nec aliquem vel aliquam seu aliquid inhumare infodere destruere aut justiciare eis monachis alibi non licebit Nec nos vel heredes nostri similiter alibi premissa facere poterimus quam in loco predicto in terra religiosorum ipsorum Nec nobis nec ipsis hoc licebit sed nos in terra nostra propria hoc poterimus facere si voluerimus quod si nos vel heredes nostri fecerimus furce predicte predictis monachis remanebunt in territorio predicto Et ipsi vel mandatum eorumdem monachorum et nos vel mandatum nostrum communibus sumptibus et expensis nos et heredes successores nostri communiter reficere vel refici facere tenebimur furcas predictas cum defecerent Si vero nos vel heredes nostri alibi in terra nostra furcas alias fecerimus et ille predicte furce eisdem monachis remanerint eas reficere et reparare poterunt quando voluerunt ut sibi videbitur expedire Insuper nos volentes spontanea voluntate non choacti nec seducti ipsis religiosis graciam facere pleniorem et saluti anime nostre et antecessorum quantum possumus consulere cupientes eis damus in puram et perpetuam elemosinam quidquid juris habemus et habere possumus in predictis exceptis dictis tribus casibus et id quod nobis assignatum est in recompensationem dictorum quinque solidorum parisiensium nec non omnes libertates immunitates concessiones possessiones collationes elemosinas et donationes factas a predecessoribus et parentibus nostris dictis religiosis et prioratui predicto hominibus hospitibus censuariis familie ancillis ac rebus eorumdem confirmamus laudamus ac etiam approbamus Volentes quod de omnibus et singulis premissis imperpetuum gaudeant libere pacifice et quiete retentis nobis et heredibus nostris tribus casibus supradictis cum aliis superius jam expressis Et de hiis omnibus et singulis bona fide et perpetuo tenendis nos et heredes et quoscunque successores nostros et omnia bona nostra habita et habenda ubicumque existentia mobilia et immobilia pariter obligamus In cujus rei testimonium et munimen nos in hoc unanimiter concordantes predictis religiosis presentes dedimus litteras sigillorum nostrorum munimine roboratas Actum anno domini millesimo ducentesimo sexagesimo mense februario