Charter Document - 04810392

Nous Guy de Chasteillon cuens de Bloys sires d'Avesnes et de Guyse et nous doyan et Chapistre de l'église de Chartres fesons savoir à tous que comme débat ou descort feust ou peust estre entre nous conte de Bloys d'une part et nous deen et Chapistre devant diz d'autre sus ce que nous conte de Bloys disons et maintenons nous et nos devants contes de Bloys avoir esté et estre en possession et en seisine d'avoir la court la cognoissance et la joustice en tous cas des hommes desdiz doyen et Chapistre estaigiers en nostre contée et laditte justice à nous appartenir de droit commun lesdiz doyen et Chapistre disanz au contraire à la parfin pour bien de pez nous parties dessus dittes sceue et enquise la verité sus les débaz et descors dessus diz eue plaine délibéracion sus ce avons fez les acorz et convenances qui ensigvent c'est assavoir que nous deen et Chapistre dessus diz voulons et accordons que Monseigneur le conte de Bloys devant dit ses heirs et ses successeurs et ceuls qui de luy auront cause aient héritablement à touzjours come leur bon droit et leur chose la court la connoissance et la justice des hommes estagiers en la terre doudit conte en toutes causes civilles et pécunières tant en actions personelles come réelles et toutes les choses qui en poient dépendre par usaige et coustume de pais aussi de nos diz hommes qui ne seront estagiers en la terre doudit conte qui se sousmettront à la juridicion doudit conte et de ses successeurs ès causes civilles et peccunières dessus dittes Et nous conte de Bloys dessus dit voulons et acordons que lesdiz doyen et Chapistre aient héritablement à touzjours la juridicion et exécucion en touz cas criminels de leurs hommes dessus diz soient estagiers en nostre dite terre ou non estagiers laquelle juridicion et exécution lesdiz doyen et Chapistre exerciteront feront et acompliront en leur terre et non en la nostre Et nous doyen et Chapistre dessus diz volons et accordons que la prise de nos diz hommes en tous cas criminels en présent meffet ou non appartendra audit conte en sa terre sauve que à nous doyen et Chapistre sera faite la délivrance de nos diz hommes pris pour le cas dessus dit par ledit conte de Bloys ou par ses genz pour en avoir la cognoissance la pugnicion et l'exécution si comme dessus est dit et de nos diz hommes meffeteurs leurs biens meubles et héritaiges estans en la terre doudit conte de Bloys demourront et appartendront audit conte en cas de fourfaiture Prometans nous parties dessus dites en bonne foy sus l'obligacion de nous et de nos biens tenir et garder toutes les chouses dessus dictes et chascunes d'icelles sanz venir encontre En tesmoing de laquelle chose nous conte de Bloys nous doyen et Chapistre dessus diz avons fet sceller ces présentes lettres de nos seaus données l'an de grace mil trois cenz et trante le jeudi après la saint Martin d'esté