Charter Document - 04810342

Clemens episcopus servus servorum Dei venerabili patri archiepiscopo et dilectis filiis decano et priori secularis ecclesie Sancti Ursini Bituricensis salutem et apostolicam benedictionem Lecta coram nobis dilectorum filiorum decani et Capituli ecclesie Carnotensis peticio continebat quod inter ipsos ex parte una et nobilem virum Johannem comitem castellanum prepositos balivos servientes et clericos ipsius comitis et mercerios Carnotenses super fractione domus Reginaldi Colli Rubei civis Carnotensis advocati quondam Reginaldi de Bello Monte canonici ejusdem ecclesie necnon super modo advocationis burgensium Carnotensium quos canonici dicte ecclesie ad sua obsequia advocabant captione matricularii dicte ecclesie ac contentionibus et rebus aliis ex altera materia questionis exorta fuit tandem super hoc in venerabiles fratres nostros Belvacensem Autisiodorensem et Ebroicensem episcopos et dilectos filios fratrem Symonem tunc priorem fratrum Predicatorum Parisiensium et magistrum Henricum de Virziliaco canonicum Autisiodorensem a partibus sub certa pena concorditer compromissum Adjecta quod si contingeret aliquem arbitrorum ipsorum abesse vel etiam impediri magister Petrus tunc decanus Cenomannensis si presens esset cum aliis procederet loco ejus Promiserunt etiam partes ipse sub pena hujusmodi quod ratum et firmum haberent et observarent quicquid ab eisdem arbitris statutum fuit vel etiam ordinatum Sane predicti arbitri non attendentes quod ad instar judiciorum arbitria sunt redacta lite non contestata et juris ordine non servato contra dictos decanum et Capitulum minus provide arbitrium protulerunt quod redundat in grave dicte Carnotensis ecclesie prejudicium et non modicam lesionem propter quod idem decanus et Capitulum non valere dictum arbitrium asserentes nobis humiliter supplicarunt ut ipsum arbitrium denunciari nullum et eos ad observationem ipsius aliquatenus non teneri per discretos aliquos mandaremus Quia vero nobis non constitit de premissis dilectioni vestre per apostolica scripta mandamus quatinus partibus convocatis audiatis causam et appellatione remota fine debito terminetis facientes quod decreveritis per censuram ecclesiasticam firmiter observari proviso ne in terram dicti nobilis et universitatis Carnotensis excommunicationis vel interdicti sententiam proferatis nisi a nobis super hoc mandatum reciperitis speciale Testes autem qui fuerint nominati si se gratia odio vel timore subtraxerint censura simili appellatione cessante cogatis veritati testimonium perhibere Quod si non omnes hiis exequendis potueritis interesse tu frater archiepiscope cum eorum altero ea nichilominus exequaris Datum Perusii ii nonas maii pontificatus nostri anno primo