Charter Document - 04810335
| Charter Number: | 04810335 |
|---|---|
| Cartulary Title: | Cartulaire de Notre-Dame de Chartres |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1260 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis magister Galterus de Frescoto canonicus Carnotensis salutem in Domino Noverint universi tam presentes quam futuri quod ego pro remedio anime mee patris et matris meorum et aliorum antecessorum meorum dedi concessi et assignavi in perpetuum capelle quam ego in honore beate Catharine sanctorum Stephani et Vincentii et aliorum sanctorum construxi apud Frescotum in hereditate mea totam medietariam de Syverio cum herbergamento et omnibus terris arabilibus et inarabilibus et aliis pertinentiis ad eandem medietariam prout possidentur et decem et octo denarios annui census cum gallinis et pertinentiis ad eundem censum que habebam in dicta villa Dedi etiam et concessi et assignavi dicte capelle totum locum in quo est sita dicta capella qui vulgariter dicitur Chesneia prout extenditur in longum et latum usque ad viam per quam itur de Frescoto apud molendinum de Prato Motoso et usque ad fundum fossati quod est inter dictam Chesneyam et plesseyum Frescoti et etiam usque ad fundum fossati quod est similiter inter dictam Chesneyam et nemus Frescoti Dedi insuper et assignavi dicte capelle campum qui est inter dictam Chesneyam et Mileceyum prout extenditur in longum et latum a fundo dicti fossati quod est inter dictam Chesneyam et nemus Frescoti usque ad metam que est inter domum defuncti dicti Troalle et herbergamentum monachorum Bonevallis et etiam prout continetur a dicta meta usque ad viam per quam itur de Prato Motoso apud Frescotum Dedi etiam et concessi et assignavi capelle predicte quemdam campum prout continetur in longum et latum quem habebam apud Terram Albam juxta vineas de Bonavalle et omne jus justiciam jurisdictionem possessionem proprietatem et dominium que in omnibus predictis rebus et earum pertinentiis habebam vel habere poteram ex quacumque causa a presbiteris et personis qui pro tempore dictam capellam possidebant quiete et pacifice tenenda et habenda et in perpetuum possidenda Ita tamen quod presbiter seu persona qui pro tempore dictam capellam habebit per se vel per alium in dicta capella singulis diebus tenebitur pro Defunctis celebrare exceptis diebus dominicis et festivis novem lectionum et etiam horas canonicas decantare Et quantum ad omnia permissa tenenda me et heredes meos universales et singulos obligavi In cujus rei testimonium et munimen presentibus litteris sigillum meum apposui Datum anno Domini millesimo ducentesimo sexagesimo mense maio