Charter Document - 04810330

In nomine sancte et individue Trinitatis amen Ludovicus Dei gracia Francorum Rex Notum facimus universis quod super procuracione seu gisto quod apud Carnotum in domo episcopi super episcopum habebamus et super alia procuratione seu gisto quod apud Fresneium villam suam ab eodem episcopo petebamus inter nos pro nobis et nostris successoribus et dilectum et fidelem nostrum Matheum Carnotensem episcopum pro se et successoribus suis consenciente Capitulo Carnotensis ecclesie talis compositio intercessit quod nos omne jus gisti seu procurationis hujusmodi quod ab ipso episcopo vel ejus successoribus exigere poteramus omnino memorato episcopo suisque successoribus quittavimus im perpetuum et quitamus ita quod nec nos nec successores nostri possimus ab ipso episcopo vel ejus successoribus ratione gisti vel procurationis in predictis locis nec alibi ullo unquam tempore aliquid exigere in futurum Idem autem episcopus pro hac quitatione et pace promisit nobis et concessit dare quinquaginta libras turonenses annui redditus im perpetuum de quibus taliter duximus ordinandum videlicet quod nos ob devocionem precipuam quam ad ipsam ecclesiam Beate Marie Carnotensis habemus necnon divini amoris intuitu et ob remedium anime nostre et antecessorum nostrorum de predicto redditu duas capellanias in eadem ecclesia institui volumus et fundari in duobus nominibus quorum unum a dextra parte prope introitum porte Crucis ejusdem ecclesie in honore cunctorum sanctorum Angelorum Dei aliud vero a sinistra parte propre introitum porte Crucis ejusdem ecclesie in honore omnium sacrarum Virginum construentur Quorum uterque capellanus de predicta summa quindecim libras turonenses ad talem terminum percipiet annuatim videlicet centum solidos in crastino sancti Remigii et alios centum in crastino Candelose et alios centum solidos in crastino Ascensionis dominice Tenebitur autem uterque ipsorum diebus singulis pro nobis quandiu vixerimus per se vel per alium si legitimum impedimentum haberent missam celebrare secundum quod est in ecclesia consuetum Et frequentius missam de Sancto Spiritu et de beata Dei genitrice petimus celebrari et in omnibus missis pro nobis collectam dici et orationem fieri specialem Singulis autem diebus sabbati ad altare de Sanctis Virginibus missam de gloriosa Virgine regina Virginum et in altari de Sanctis Angelis qualibet secunda feria missam de sanctis Angelis celebrabunt nisi diebus ipsis aliqua sollempnis festivitas eveniret de qua deberent facere potius officium proprium et sollempne Post decessum vero nostrum in predictis duobus altaribus missam que dicitur pro defunctis fidelibus singulis diebus uterque celebrare tenebitur capellanus excepto quod in diebus sabbati ad altare de Virginibus missa de beata Virgine et in secundis feriis ad altare de Angelis missa de Angelis celebrabitur sicut superius est expressum Diebus tamen sollempnibus in quibus non consuevit ecclesia celebrare pro Mortuis poterunt officium celebrare quod sollempnitati competet aut diei Collationem autem dictarum duarum capellani arum nobis retinemus tantummodo prima vice et postmodum ad Capitulum in perpetuum pertinebit Volumus autem quod talibus conferantur qui alia ecclesiastica beneficia non habeant et qui jam ad sacerdotium sint promoti vel qui promoveri debeant in proximis ordinibus successive et qui personaliter et continue resideant in eisdem Provideat tamen Capitulum quod interim cotidie pro nobis sine defectu aliquo celebretur ibidem sicut superius est expressum Donamus autem et concedimus de residuo dicti redditus ad faciendum distributiones secundum disposicionem Capituli canonicis et clericis ejusdem ecclesie in quinque anniversariis infra nominatis viginti libras turonenses videlicet in anniversario clare memorie genitoris nostri Ludovici quatuor libras turonenses in anniversario pie recordationis genitricis nostre Blanche quatuor libras turonenses in anniversario recolende memorie fratris nostri R[oberti] quondam comitis Attrebatensis et eorum omnium qui in Egypto et alias in transmarinis partibus nobis ibidem existentibus decesserunt quatuor libras turonenses in nostro eciam post decessum nostrum similiter quatuor libras turonenses et in anniversario karissime uxoris nostre Margarete Regine post decessum ejusdem quatuor libras turonenses Que quidem anniversaria sollempniter fieri petimus et ad majus altare diebus obitus nostri et distributiones anniversariorum illis dumtaxat fiant canonicis et clericis qui interfuerint quolibet anniversario tam in vigiliis quam in missa Quandiu autem vixerimus nos et Regina predicta uxor nostra pro nobis et ipsa in duobus proximis diebus post octabas Penthecostes in quibus nullum festum novem lectionum evenerit una missa de Sancto Spiritu et alia de beata Virgine debent in eadem ecclesia sollempniter celebrari et in utraque die quatuor libras turonenses de predicta pecunia distribuentur canonicis et clericis qui affuerint celebrationi missarum Tenetur autem episcopus Carnotensis et successores ejus qui pro tempore fuerint Carnotenses episcopi predictum redditum annuatim sine difficultate persolvere videlicet triginta libras ad terminum prelibatum pro duabus capellaniis capellanis qui pro tempore deservient in eisdem et dictas viginti libras Capitulo Carnotensi ad faciendas distributiones in anniversariis antedictis ita quod si in solutione deficeret terminis prenotatis nos et successores nostri prefatum episcopum et successores ejus ad requisitionem Capituli per captionem bonorum suorum possemus compellere ad solutionem de predicto plenarie faciendam Quod ut perpetue stabilitatis robur obtineat presentem paginam sigilli nostri auctoritate ac regii nominis karactere inferius annotato fecimus communiri Actum Carnoti anno Domini millesimo ducentesimo quinquagesimo nono mense augusto regni vero nostri anno tricesimo tertio Astantibus in palatio nostro quorum nomina supposita sunt et signa Dapifero nullo Signum Johannis buticularii Signum Affonsi camerarii Signum Egidii constabularii