Charter Document - 04810313

Universis presentes litteras inspecturis officialis Carnotensis salutem in Domino Noveritis quod in nostra presentia constituti Leodegarius dictus Parent de Bonavalle et Gileta ejus filia confessi fuerunt quod anno Domini MCCL tercio die jovis post dominicam qua cantatur Reminiscere fuerunt presentes in capitulo Carnotensi et quod eadem confessi fuerunt in capitulo se esse homines de corpore ecclesie Carnotensis Confessi etiam fuerunt coram nobis dicti Leodegarius et Gileta quod ipsi dicta die jovis petierunt in capitulo Carnotensi se manumitti ab eodem Capitulo et quod dicta die qua manumissi fuerunt a Capitulo Carnotensi et ante manumissionem suam juraverunt publice in capitulo quod in negociis Capituli Carnotensis et in eis que tangunt vel tangent Capitulum sive ecclesiam Carnotensem de cetero fideliter se habebunt nec prestabunt patrocinium consilium vel auxilium contra Capitulum vel ecclesiam Carnotensem in causis sive negociis que tangunt vel tangent Capitulum sive ecclesiam Carnotensem vel etiam contra aliquem canonicum Carnotensem quandiu erit canonicus Carnotensis nec dolum vel fraudem committent contra Capitulum vel ecclesiam Carnotensem et si scirent quod injuria atrox vel dampnum grave deberet inferri Capitulo Carnotensi vel eciam canonico Carnotensi ipsi pro posse suo hoc impedirent et si non valerent impedire significarent hoc vel significari facerent quam cito commode possent Capitulo et canonico Carnotensi cui injuria deberet inferri Preterea confessi fuerunt coram nobis et in jure predicti Leodegarius et Gileta quod dictis die et anno juraverunt ipsi in capitulo quod si contingeret Capitulum Carnotense seu aliquem canonicum Carnotensem habere causam seu querelam contra aliquem hominem seu aliquam feminam sive contra plures super hoc quod Capitulum sive aliquis canonicus Carnotensis dicat quod aliqui vel aliquis sint homines vel femine de corpore ecclesie Carnotensis contra quos Capitulum seu canonicus Carnotensis habebunt querelam seu causam ipsi Leodegarius et Gileta super hoc ferent sine compulsione aliqua legitimum testimonium absque hoc quod faciant seu prestent gagium duelli ad requisitionem Capituli Carnotensis seu canonici de parentela sive genere alicujus sive aliquorum contra quos Capitulum seu canonicus Carnotensis habebunt querelam sive causam etiam si aliquis vel aliqui contra quos habebunt querelam attingebant predictos Leodegarium et Giletam in proximiore gradu Item confessi fuerunt dicti Leodegarius et Gileta in jure coram nobis quod ipsi predictis die et anno juraverunt in capitulo Carnotensi quod ipsi non facient nec procurabunt fieri communiam in civitate Carnotensi vel alibi immo impedient pro posse suo ne fiat et si facta fuerit non erunt de illa communia et si contra hunc articulum venirent ipso facto in pristinum jugum servitutis redirent Juraverunt etiam quod ipsi contra ecclesiam Carnotensem seu contra aliquem canonicum Carnotensem aliquam conspirationem non facient seu colligationem et si facta fuerit non erunt de conspiratione seu colligatione predicta In cujus rei testimonium et munimen presentes litteras sigillavimus sigillo curie Carnotensis Datum anno Domini MCCL tercio die veneris post dominicam qua cantatur Reminiscere