Charter Document - 04810209
| Charter Number: | 04810209 |
|---|---|
| Cartulary Title: | Cartulaire de Notre-Dame de Chartres |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1213 |
| Date type: | Internal, A.D., Calendar |
| Resource Link(s): |
|
Charter:
Ego Willelmus Aguillon miles notum facio universis presentibus pariter et futuris ad quos presens scriptum pervenerit quod ego vite preterite et injuriarum quas intuli Carnotensi ecclesie recordatus necnon excommunicationum quas propter hec multociens incurri absque ulla quam inde solverim satisfactione emende ductus penitencia et compunctus in horum recompensationem et in remissionem peccatorum meorum et antecessorum meorum dicte ecclesie in perpetuam contuli elemosinam et donavi totam viariam quam habebam tam in parrochia Barjoville quam in parrochia de Morenceis concedente hoc uxore mea Margarita fide interposita et concedentibus hoc filiabus meis Helisende et Isabel retentis et salvis michi aliis redditibus meis quos ad modum antecessorum meorum ibidem debeo possidere Et donum istud obtuli super majus altare ejusdem ecclesie per litteras presentes super illud impositas et oblatas Quod ut ratum habeatur atque permaneat inconcussum presentem cartulam inde conscriptam sigilli mei feci munimine roborari Actum anno gratie millesimo ducentesimo duodecimo quinto decimo kalendas aprilis