Charter Document - 04810154
| Charter Number: | 04810154 |
|---|---|
| Cartulary Title: | Cartulaire de Notre-Dame de Chartres |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1202 |
| Date type: | Internal, A.D. |
| Resource Link(s): |
|
Charter:
Raginaldus Dei gracia Carnotensis episcopus omnibus ad quos littere iste pervenerint salutem in Domino Noverint universi presentis scripti paginam inspecturi quod Gaufridus Mordens miles recipiens de caritate Carnotensis Capituli novem libras carnotensis monete dedit in elemosinam eidem Capitulo in perpetuum et concessit sex annone et tres avene sextarios ad mensuram carnotensem et ad valorem bladi de granica de Fontanis in terra sua de Grungnellis annuatim percipiendos Ita quod quotiens mutabitur in terra illa medietarius seu colonus idem miles seu quicumque in ejusdem terre dominio ipsi successerit dicto Capitulo presentialiter exhibere tenebitur eum qui de novo terre illi adhibebitur medietarium seu colonum juratoriam cautionem de reddendo fideliter predicto redditu prestiturum Hanc autem donationem et quam prenotavimus pactionem observandam fideliter et tuendam juraverunt prefatus Gaufridus miles et fratres ejus Hubertus scilicet miles et Willelmus concedente Hildeburge dicti Gaufridi militis uxore assensum quoque prebente et manucapiente Huberto de Rupe ad cujus feodum terra illa cognoscitur pertinere Quod ut ratum inconcussumque permaneat sigilli nostri munimine fecimus roborari Actum anno gracie MCCII mense maio