Charter Document - 04800070
| Charter Number: | 04800070 |
|---|---|
| Cartulary Title: | Cartulaire de Notre-Dame de Chartres |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1165 |
| Date type: | Assigned |
| Resource Link(s): |
|
Charter:
Alexander episcopus servus servorum Dei carissimo in Christo filio Ludovico illustri Francorum regi salutem et apostolicam benedictionem Dilectum filium nostrum Willelmum Carnotensem electum ad nostram presentiam venientem tum magnificentie tue obtentu tum totius sanguinis sui respectu et sue honestatis ac probitatis intuitu paterna benignitate suscepimus et ipsum dum apud nos fuit prout decuit honeste ac benigne tractantes in suis petitionibus prompto animo curavimus exaudire Eum itaque cum amoris nostre et gratie plenitudine ad propria remittentes licet de superabundanti quodam modo videatur regie excellentie propensius commendantes serenitatem tuam per apostolica scripta rogamus monemus et exhortamur attentius quatenus ipsum pro reverentia beati Petri ac nostra et sue nobilitatis ac devotionis intuitu diligere manu tenere propensius et honorare intendas et in justicia sua et commisse sibi ecclesie attentius confovere ut ipse idem circa regiam magnificentiam devotior omni tempore et fidelior apparere debeat et nos quoque excellentie tue teneamur propter hoc gratiarum actiones uberrimas exhibere Rogamus ad hec celsitudinem tuam et in Domino commonemus quatenus causam ecclesie quam velut propriam suscepisti tuendam manu tenere satagas et viriliter defensare et ad exaltationem et incrementum ecclesie sicut hactenus magnanimiter fecisse dinosceris studium et operam constanter impendas et ad hoc sicut rex christianissimus et magnificus princeps modis omnibus elabores Datum apud Montem Pessulanum xiv kalendas septembris